‘இந்த இசையும், வரிகளும் என்னை ஏதோ செய்கிறது’… வாலி-இளையராஜா பாட்டை பாடமுடியாமல் அழுத S.ஜானகி…

கவிஞர் வாலி ‘வாலிப’ கவிஞர் என அழைக்கப்பட்டவர். அவரால் எம் ஜி ஆருக்கும் பாட்டெழுத முடியும், சிவகார்த்திகேயனுக்கும் பாட்டெழுதமுடியும். காலத்திற்கு ஏற்றார்போல் தன்னை அப்டேட் செய்துகொண்டவர் வாலி. மொழியை கொண்டு அசரவைக்கும் வரிகளை படைத்து நம்மை ‘அட’ போட வைப்பவர் வாலி. ஒவ்வொரு வரிகளிலும் அவ்வளவு கவித்தன்மைகள் நிறைந்திருக்கும்.

இவர் எழுதிய பாடல்கள் எல்லாம் காலத்துக்கும் பேசப்படுபவை. அந்தளவுக்கு அர்த்தங்களும் தத்துவங்களும் பொதிந்துகிடப்பவை. இவர் இறந்த பின்பும் இவரது பாடல்கள் வெளிவந்துகொண்டிருந்தன. தனது கடைசி காலத்திலும் தமிழுக்காக ஓயாது உழைத்தவர் வாலி. காதல், தத்துவம், ஏக்கம், சோகம், காமம், குத்து பாட்டு என எந்த சூழ்நிலைக்கும் பாடல்களை இயற்றி, ரசிகர்களை மயக்கும் வாலி, பாடல் ரெக்கார்டிங்கின்போது, பாடகி ஜானகியை பாட முடியாமல் அழச் செய்த சம்பவமும் நடந்துள்ளது.

1978 ஆம் ஆண்டு வெளியாகி சூப்பர் ஹிட் அடித்த திரைப்படம் அச்சாணி. இத்திரைப்படத்திற்க  இளையராஜா இசையமைத்திருந்தார். பாடல்களை வாலி எழுதியிருந்தார். இந்தப் படத்தில்  சூப்பர் ஹிட் அடித்த பாடல் தான் ‘மாதா உன் கோவிலில் மணி தீபம் ஏற்றினேன்.’ இந்த பாடலை பிரபல பின்னணி பாடகி எஸ்.ஜானகி பாடியிருந்தார்.

இந்த பாடல் உருவான போது பல தடங்கல்கள் ஏற்பட்டதாம். குறிப்பாக பாடலை பாடிக்கொண்டிருந்த ஜானகி ‘பிள்ளை பெறாத பெண்மை தாயானது. அன்னை இல்லாத மகனைத் தாலாட்டுது’ என்கிற வரிகளை பாடாமல் நிறுத்திவிட்டாராம். அப்பொழுது அவரை அனைவரும் திரும்பி பார்த்துள்ளனர். அங்கு ஜானகியை தொடர்ந்து பாட முடியாமல் தேம்பி தேம்பி அழுது கொண்டிருந்தாராம். அவரிடம் சென்று ‘ என்ன ஆச்சு..?’ என இளையராஜா கேட்க ‘இந்த இசையும், வரிகளும் என்னை ஏதோ செய்கிறது’ என கூறியுள்ளார்.