தமிழக அரசியல் களம் தற்போது அடுத்தடுத்த திருப்பங்களை சந்தித்து வருகிறது. தமிழக வெற்றிக் கழகத்தின் தோழமை கட்சிகளின் கூட்டத்தில் இடதுசாரி கட்சிகள் பங்கேற்கப்போவதில்லை என்று அறிவித்திருந்த நிலையில், இன்று அக்கட்சியின் தலைவர்கள் முதலமைச்சர் விஜய்யை நேரில் சந்தித்துப் பேசியுள்ளனர். தவெகவுக்கு காங்கிரஸ், இந்திய கம்யூனிஸ்ட் கட்சி (சிபிஐ), மார்க்சிஸ்ட் கம்யூனிஸ்ட் கட்சி (சிபிஎம்), விடுதலை சிறுத்தைகள் மற்றும் ஐயுஎம்எல் ஆகிய கட்சிகள் ஆதரவு தெரிவித்திருந்தாலும், அவை இன்னும் அதிகாரப்பூர்வமாக கூட்டணியில் இணையவில்லை. இந்த கட்சிகளை ஒன்றிணைத்து புதிய கூட்டணியை உருவாக்க தவெக திட்டமிட்டு, தலைவர்கள் மற்றும் மக்கள் பிரதிநிதிகளுடன் ஆலோசனை கூட்டத்தை நடத்தவிருந்த சூழலில், சிபிஐ மற்றும் சிபிஎம் தலைவர்கள் அதில் பங்கேற்கப் போவதில்லை என அறிவித்துவிட்டு முதலமைச்சரை சந்தித்துள்ளது குறிப்பிடத்தக்கது.
இந்த சந்திப்பு குறித்து விளக்கமளித்துள்ள சிபிஎம் மாநில செயலாளர் பெ.சண்முகம், பெண்கள் மற்றும் குழந்தைகள் மீதான வன்கொடுமைகளைத் தடுக்க அரசு தீவிர நடவடிக்கை எடுக்க வேண்டும் என்று வலியுறுத்தியுள்ளார். குறிப்பாக, காவல்துறையின் வேறு பிரிவுகளில் இருந்து ‘சிங்கப்பெண்கள் சிறப்பு அதிரடி படைக்கு’ மாற்றப்பட்ட காவலர்களுக்கு, சிறப்புப் பயிற்சிகளை வழங்க தனி முயற்சி எடுக்க வேண்டும் என்று கோரிக்கை விடுத்துள்ளார். மேலும், மத்திய அரசு கொண்டு வந்துள்ள புதிய தொழிலாளர் சட்டத்திற்கான விதிகளை வகுக்கும் போது, அனைத்து தொழிற்சங்க தலைவர்களையும் அழைத்து பேசி தொழிலாளர்களை பாதுகாக்கும் வகையில் விதிகளை உருவாக்க வேண்டும் என்றும், பாஜகவின் சட்டத்தை அப்படியே அனுமதிக்கக் கூடாது என்றும் அவர் குறிப்பிட்டுள்ளார்.
தொழிலாளர் நலன் மற்றும் காவிரி விவகாரம் குறித்தும் சிபிஎம் தரப்பில் முக்கிய கருத்துக்கள் முன்வைக்கப்பட்டுள்ளன. கேரளாவில் தொழிலாளர் சட்ட விதிகளை வகுப்பதற்காக நீதிபதி கோபால் கவுடியா தலைமையில் அமைக்கப்பட்ட குழுவின் அறிக்கையை தமிழ்நாட்டு அரசு பெற்று, அது குறித்து ஆலோசிக்க வேண்டும் என சண்முகம் கேட்டுக்கொண்டுள்ளார். இவற்றுடன், நீண்ட நாட்களாக நீடித்து வரும் காவிரி நீர் விவகாரத்தில் மாநிலத்தில் ஒத்த கருத்தை உருவாக்குவதற்காக, அனைத்து அரசியல் கட்சிகள் மற்றும் விவசாய சங்கங்களை அழைத்து அரசு விரிவான ஆலோசனை நடத்த வேண்டும் என்றும் முதலமைச்சரிடம் வலியுறுத்தப்பட்டுள்ளது.
மறுபுறம், வேலைவாய்ப்பு மற்றும் கல்வித்துறை சார்ந்த கோரிக்கைகளை சிபிஐ மாநில செயலாளர் வீரபாண்டியன் முதலமைச்சரிடம் முன்வைத்துள்ளார். தமிழகத்தில் புதிய வேலைவாய்ப்புகளை உருவாக்குவதோடு, குறிப்பாக பள்ளி மற்றும் கல்லூரிகளில் நீண்ட நாட்களாக காலியாக உள்ள பணியிடங்களை உடனடியாக நிரப்ப வேண்டும் என்று அவர் கோரியுள்ளார். இந்த காலிப் பணியிடங்களால் கல்வித் தரம் கடுமையாக பாதிக்கப்படுவதாக சுட்டிக்காட்டிய அவர், உதவிப் பேராசிரியர் பணியிடங்களை விரைந்து நிரப்ப வேண்டும் என்றார். மேலும், ஒப்பந்த முறை உழைப்புச் சுரண்டலுக்கு வழிவகுக்கும் என்பதால் அதற்கு முற்றிலும் முடிவுகட்ட வேண்டும் என்றும், நீண்ட காலமாக தற்காலிகமாக பணியாற்றி வரும் ஊழியர்களை பணி நிரந்தரம் செய்ய வேண்டும் என்றும் அவர் வலியுறுத்தியுள்ளார்.