ஈரான் மற்றும் இஸ்ரேல் இடையே நிலவி வரும் போரில், ஈரானுக்கு ஆதரவாக ரஷியாவும் சீனாவும் ‘Axis of Evasion’ (தடைகளைத் தவிர்க்கும் அச்சு) என்ற ரகசியக் கூட்டமைப்பின் மூலம் மறைமுகமாகச் செயல்பட்டு வருவது சர்வதேச அரசியலில் பெரும் பரபரப்பை ஏற்படுத்தியுள்ளது. அமெரிக்கா விதித்துள்ள பொருளாதாரத் தடைகளைத் தகர்த்து, ஈரானிடமிருந்து சீனா பெருமளவில் கச்சா எண்ணெயை இறக்குமதி செய்கிறது. இதற்குப் பதிலாக, ஈரான் தனது ராணுவ பலத்தைப் பெருக்கத் தேவையான நவீன தொழில்நுட்பங்கள் மற்றும் மின்னணு உதிரிபாகங்களைச் சீனா தாராளமாக வழங்கி வருவதாகப் பாதுகாப்பு ஆய்வாளர்கள் கருதுகின்றனர்.
மேற்கத்திய நாடுகளில் தயாரிக்கப்படும் சிவிலியன் பயன்பாட்டிற்கான உதிரிபாகங்கள், சீன விநியோகஸ்தர்கள் வழியாக ஈரானிய ராணுவத் தொழிற்சாலைகளைச் சென்றடைகின்றன. இவ்வாறு கிடைக்கும் பாகங்களைக் கொண்டு ஈரான் தனது ஆயுதக் கிடங்கை நவீனப்படுத்தி வருகிறது. குறிப்பாக, ரஷியத் தயாரிப்பு ட்ரோன்களைப் பயன்படுத்தி அமெரிக்கா மற்றும் இஸ்ரேல் படைகள் மீது ஈரான் தாக்குதல் நடத்தி வருவதாக உக்ரைன் அதிபர் ஜெலன்ஸ்கி சமீபத்தில் எச்சரித்திருந்தார். இந்த ரகசிய விநியோகச் சங்கிலி மூலம் போருக்குத் தேவையான அனைத்து உதவிகளையும் ரஷியாவும் சீனாவும் திரைக்குப் பின்னால் இருந்து வழங்கி வருகின்றன.
ஈரானிய ஏவுகணைகள் மற்றும் ட்ரோன்கள் இலக்குகளைத் துல்லியமாகத் தாக்க, அமெரிக்காவின் ஜிபிஎஸ் (GPS) வசதிக்கு மாற்றாகச் சீனாவின் ‘BeiDou’ செயற்கைக்கோள் வழிகாட்டுதல் அமைப்பை ஈரான் பயன்படுத்துகிறது. இது போர்க்களத்தில் ஈரானுக்குப் பெரும் சாதகமாக அமைந்துள்ளதுடன், போலியான சிக்னல்களை உருவாக்கி அமெரிக்கப் படைகளைக் குழப்பவும் உதவுகிறது. வல்லரசு நாடுகளின் இந்தத் தொழில்நுட்ப ஒத்துழைப்பு, ஈரானின் தாக்குதல் திறனைப் பலமடங்கு அதிகரித்துள்ளதாக மேற்கத்திய உளவு அமைப்புகள் கவலை தெரிவித்துள்ளன.
தற்போதைய சூழலில், அதிபர் டிரம்ப் இந்த வளைகுடாப் போரை முடிவுக்குக் கொண்டு வர வேண்டுமானால், ஈரானைத் தாக்குவதுடன் மட்டும் நின்றுவிட முடியாது. ஈரானுக்குப் பின்னால் இருந்து முட்டுக்கொடுக்கும் ரஷியா மற்றும் சீனாவின் இந்த ரகசிய விநியோகச் சங்கிலியை உடைப்பது அமெரிக்காவிற்குப் பெரும் சவாலாக இருக்கும். இந்த விநியோகச் சங்கிலி நீடிக்கும் வரை, ஈரானின் ராணுவ நடவடிக்கைகளைக் கட்டுப்படுத்துவது கடினம் என்பதால், வரும் நாட்களில் சர்வதேச அளவில் கடுமையான ராஜதந்திர மோதல்கள் எதிர்பார்க்கப்படுகின்றன.