நடிகர் கமல்ஹாசனின் மகளும் பிரபல நடிகையுமான ஸ்ருதிஹாசன், மும்பையில் தன்னை அநாகரீகமாக அழைத்த நபருக்கு உடனடியாகப் பதிலடி கொடுத்த வீடியோ இணையத்தில் வைரலாகி வருகிறது. பொது இடத்தில் சென்றுகொண்டிருந்த ஸ்ருதியை வழிமறித்த நபர் ஒருவர், “ஹாய் அம்மா” என்று கிண்டலாகக் கூற, இதனால் ஆத்திரமடைந்த அவர், “நான் என்ன உன்னுடைய அம்மாவா?” என்று மிகக் காட்டமாகக் கேட்டு அந்த நபரை வாயடைக்கச் செய்துள்ளார். எதற்கும் அஞ்சாமல் தனது கருத்தைப் தைரியமாகப் பதிவு செய்யும் ஸ்ருதியின் இந்தத் துணிச்சலான செயலை அவரது ரசிகர்கள் சமூக வலைதளங்களில் பாராட்டி வருகின்றனர்.
தற்போது மிஷ்கின் இயக்கத்தில் உருவாகியுள்ள ‘ட்ரெய்ன்’ திரைப்படத்தில் நடித்து முடித்துள்ள அவர், அந்தப் படத்தின் வெளியீட்டிற்காகக் காத்திருக்கிறார். திரையுலகில் பாடகியாகவும் நடிகையாகவும் முத்திரை பதித்துள்ள ஸ்ருதிஹாசன், தனது தனிப்பட்ட வாழ்க்கை மற்றும் காதல் உறவுகள் குறித்து எழும் விமர்சனங்களுக்கு எப்போதும் வெளிப்படையாகவே பதிலளிப்பவர். திருமணத்தின் மீது தனக்கு உடன்பாடில்லை என்று அண்மையில் அறிவித்திருந்த அவர், தற்போது தன்னை வம்பிழுத்தவருக்குப் பாடம் புகட்டியதன் மூலம் மீண்டும் செய்திகளில் இடம்பிடித்துள்ளார்.