நிறம் மாற்றப்பட்ட யானையின் உயிர் பிரிந்தது.. ரசாயன வண்ணமே எமனானதா…? வைரலான ‘பிங்க் எலிஃபண்ட்’ மரணத்தில் அதிரடி திருப்பம்..!!

ஜெய்ப்பூரில் ‘பிங்க் எலிஃபண்ட்’ (இளம் சிவப்பு யானை) என சமூக வலைதளங்களில் வைரலான ‘சஞ்சல்’ என்ற பெண் யானை உயிரிழந்த சம்பவம், விலங்கு நல ஆர்வலர்களிடையே பெரும் கொந்தளிப்பை ஏற்படுத்தியுள்ளது. அண்மையில் ரஷ்யக் கலைஞர் ஒருவர் இந்த யானையின் உடல் முழுவதும் இளஞ்சிவப்பு நிறத்தில் வண்ணம் தீட்டி, அதனை ஒரு கலைப்படைப்பாகச் சித்தரித்த வீடியோ வைரலானது. இந்தச் செயலுக்கு அப்போதே கடும் எதிர்ப்புகள் கிளம்பிய நிலையில், தற்போது அந்த யானை உயிரிழந்துள்ள செய்தி அதிர்ச்சியை ஏற்படுத்தியுள்ளது.

யானையின் உயிரிழப்பிற்கு அந்த நச்சுத்தன்மை வாய்ந்த வண்ணப் பூச்சுகளே காரணம் என நெட்டிசன்கள் அந்த ரஷ்யக் கலைஞரைச் சாடி வருகின்றனர். யானையின் மென்மையான தோலில் ரசாயனங்கள் கலந்த வண்ணத்தைப் பூசியது அதன் ஆரோக்கியத்தைப் பாதித்திருக்கலாம் என்று குற்றம் சாட்டப்படுகிறது. விலங்குகளை வெறும் காட்சிப் பொருளாகவும், விளம்பரத்திற்காகவும் பயன்படுத்துவதற்கு எதிராகச் சமூக வலைதளங்களில் விவாதங்கள் சூடுபிடித்துள்ளன.

இருப்பினும், யானையின் மரணத்திற்கு ‘ஹெர்பிஸ்’ (Herpes) வைரஸ் பாதிப்புதான் காரணம் என்று சில தரப்பிலிருந்து விளக்கங்கள் அளிக்கப்பட்டுள்ளன. ஆனால், அந்த யானை ஏற்கனவே உடல்நலக் குறைவால் பாதிக்கப்பட்டிருந்த நிலையில், அதன் மீது வண்ணம் பூசி சித்திரவதை செய்தது கண்டிக்கத்தக்கது என விலங்கு நல அமைப்புகள் தெரிவித்துள்ளன. சஞ்சலின் மரணம், சுற்றுலா மற்றும் கலை என்ற பெயரில் யானைகள் போன்ற விலங்குகள் எதிர்கொள்ளும் இன்னல்களை மீண்டும் ஒருமுறை வெளிச்சமிட்டுக் காட்டியுள்ளது.