ஈரானுக்குள்ளேயே இருந்த துரோகிகள்..? சொந்த நாட்டு மக்களே போட்டுக் கொடுத்த ‘ஸ்கெட்ச்’.. லாரிஜானி மரணத்தில் திடுக்கிடும் பின்னணி..!!

ஈரானின் உயர்மட்ட பாதுகாப்பு அதிகாரி அலி லாரிஜானி (Ali Larijani) கொல்லப்பட்டதற்கு, தெஹ்ரான் நகர மக்கள் வழங்கிய துல்லியமான தகவல்களே (Intelligence) காரணம் என்று இஸ்ரேலிய அதிகாரி ஒருவர் தெரிவித்துள்ளார். கடந்த 24 மணிநேரத்தில் தெஹ்ரான் குடியிருப்பாளர்களிடமிருந்து கிடைத்த “விலைமதிப்பற்ற புலனாய்வுத் தகவல்களின்” உதவியால் இந்தத் தாக்குதலை வெற்றிகரமாக நடத்த முடிந்ததாக அந்த அதிகாரி குறிப்பிட்டுள்ளார்.

லாரிஜானி சமீபகாலமாகப் பொது இடங்களில் அடிக்கடி தோன்றி மிகவும் தைரியமாகச் செயல்பட்டது, இஸ்ரேலிய உளவு அமைப்புகள் அவரைப் பின்தொடர எளிதாக அமைந்தது. அவர் பொது ஊர்வலங்களில் பங்கேற்றது மற்றும் சர்வதேச ஊடகங்களுடன் தொடர்பில் இருந்தது போன்ற செயல்பாடுகள் அவரது இருப்பிடத்தைக் கண்டறிய உதவியதாக இஸ்ரேலிய தரப்பு கூறுகிறது. கடந்த செவ்வாய்க்கிழமை அதிகாலை நடத்தப்பட்ட இந்த வான்வழித் தாக்குதலில், லாரிஜானியுடன் சேர்ந்து அவரது மகன் மற்றும் மூத்த உதவியாளர்களும் கொல்லப்பட்டதை ஈரான் அரசு ஊடகங்கள் உறுதிப்படுத்தியுள்ளன.

பிப்ரவரி 28-ம் தேதி ஈரானின் உச்ச தலைவர் அயதுல்லா அலி கமேனி கொல்லப்பட்ட பிறகு, லாரிஜானி ஈரானின் மிக முக்கியமான மற்றும் செல்வாக்கு மிக்க தலைவராகக் கருதப்பட்டார். ஈரானின் தேசிய பாதுகாப்பு கவுன்சில் செயலாளராக இருந்த இவரது மறைவு, அந்நாட்டின் பாதுகாப்பு கட்டமைப்பிற்குப் பெரும் பின்னடைவாகப் பார்க்கப்படுகிறது. இந்தச் சம்பவம் ஈரானின் உயர்மட்டத் தலைமைக்குள் இஸ்ரேலிய உளவு அமைப்புகள் எவ்வளவு ஆழமாக ஊடுருவியுள்ளன என்பதைக் காட்டுவதாகப் பாதுகாப்பு வல்லுநர்கள் கருதுகின்றனர்