பெங்களூரு பனசங்கரியில் உள்ள சுசித்ரா சினிமா மற்றும் கலாச்சார அகாதமியில், சனிக்கிழமை மாலை மகாத்மா காந்தியின் படுகொலை தொடர்பான நாடகம் அரங்கேறியபோது பெரும் பரபரப்பு ஏற்பட்டது. நாடகத்தின் இயக்குநர் அடந்தா சி. காரியப்பா இயக்கிய ‘காந்தி ஹத்யா சத்யா: காந்தி கொலையின் உண்மை’ என்ற நாடகத்தை காங்கிரஸ் கட்சியினர் தடுத்து நிறுத்தி, இயக்குநர் மீது கருப்பு மை வீசி எதிர்ப்பைப் பதிவு செய்தனர்.
காந்தியையும் அவரது படுகொலையாளி நாதுராம் கோட்சேயையும் சித்தரிக்கும் விதம் வரலாற்றைத் திரிப்பதாகவும், காந்தியை இழிவுபடுத்துவதாகவும், கொலையாளியை மகிமைப்படுத்துவதாகவும் கூறி போராட்டத்தில் ஈடுபட்டவர்கள் கடும் எதிர்ப்பு தெரிவித்தனர். இதனால் இரு தரப்பினருக்கும் இடையே வாக்குவாதம் முற்றிய நிலையில், காவல்துறையினர் உடனடியாக விரைந்து வந்து இயக்குநரை மீட்டு பாதுகாப்பாக அழைத்துச் சென்றனர்.
இந்தச் சம்பவத்தைத் தொடர்ந்து, இரு தரப்பினரும் பனசங்கரி காவல் நிலையத்தில் பரஸ்பரம் புகார்களை அளித்துள்ளனர். இதுகுறித்து பேசிய தெற்குப் பிரிவு காவல்துறை துணை ஆணையர் டாக்டர் கே. வம்சி கிருஷ்ணா, இரு தரப்பிலிருந்தும் புகார்கள் பெறப்பட்டுள்ளதாகவும், விசாரணை தொடங்கப்பட்டுள்ளதாகவும், இதன் அடிப்படையில் உரிய சட்டப்பூர்வ நடவடிக்கை எடுக்கப்படும் என்றும் தெரிவித்தார்.