வயல்வெளியில் கேட்ட 3 வயது குழந்தையின் அலறல் சத்தம்… ஊரே திரண்டு பார்த்தபோது காத்திருந்த பேரதிர்ச்சி… பச்சிளம் குழந்தையைச் சிதைத்த காம கொடூரர்கள்…!

பீகார் மாநிலம் பாட்னாவில் மூன்று வயது சிறுமி ஒருவர், அவரது சொந்த மாமா மற்றும் அவரது நண்பர்களால் கூட்டுப் பாலியல் வன்கொடுமைக்கு உள்ளாக்கப்பட்ட சம்பவம் அப்பகுதி மக்களிடையே பெரும் அதிர்ச்சியையும் ஆத்திரத்தையும் ஏற்படுத்தியுள்ளது. வெள்ளிக்கிழமை இரவு சிறுமி தனது வீட்டில் உறங்கிக் கொண்டிருந்தபோது, போதைக்கு அடிமையான அவரது மாமா குழந்தையைத் தூக்கிச் சென்றுள்ளார். வீட்டிலிருந்து சுமார் 500 மீட்டர் தொலைவில் உள்ள ஒரு ஆள்நடமாட்டமற்ற வயல்வெளிக்குக் கொண்டு செல்லப்பட்ட அந்தச் சிறுமி, அங்கு மாமா மற்றும் அவரது இரண்டு நண்பர்களால் கொடூரமான முறையில் கூட்டுப் பாலியல் வன்கொடுமைக்கு உள்ளாக்கப்பட்டதாகக் கூறப்படுகிறது.

குழந்தையின் அலறல் சத்தம் கேட்டு அப்பகுதி மக்கள் அங்கு திரண்டனர். தொடக்கத்தில் யாரோ குழந்தை திருடன் ஊடுருவிவிட்டதாக நினைத்து மக்கள் ஓடி வந்ததைக் கண்ட குற்றவாளிகள், குழந்தையை ரத்த வெள்ளத்தில் அங்கேயே விட்டுவிட்டுத் தப்பி ஓடினர். காணாமல் போன குழந்தையைத் தேடிக்கொண்டிருந்த பெற்றோர், காயங்களுடன் மீட்கப்பட்ட சிறுமியைப் பார்த்து அதிர்ச்சியில் உறைந்தனர். உடனடியாக காவல்துறைக்குத் தகவல் தெரிவிக்கப்பட்டதுடன், அதிக ரத்தப்போக்குடன் இருந்த சிறுமி மீட்கப்பட்டு பாட்னாவில் உள்ள அரசு மருத்துவமனையில் அவசர சிகிச்சைக்காக அனுமதிக்கப்பட்டார். அங்கு குழந்தைக்குத் தீவிர சிகிச்சை அளிக்கப்பட்டு வருகிறது.

சம்பவம் குறித்துத் தகவல் கிடைத்தவுடன் விரைந்து செயல்பட்ட காவல்துறையினர், தடயவியல் நிபுணர்களுடன் குற்ற இடத்தைப் பார்வையிட்டு ஆதாரங்களைச் சேகரித்தனர். இச்சம்பவத்தின் முக்கியக் குற்றவாளியான சிறுமியின் மாமா மற்றும் அவரது நண்பர்களில் ஒருவரை போலீசார் உடனடியாகக் கைது செய்தனர். தலைமறைவாக உள்ள மூன்றாவது நபரைப் பிடிப்பதற்காகத் தனிப்படைகள் அமைக்கப்பட்டு தீவிர தேடுதல் வேட்டை நடைபெற்று வருகிறது. குடும்ப உறுப்பினரே இத்தகைய கொடூரச் செயலில் ஈடுபட்டது அப்பகுதி மக்களிடையே மிகுந்த வேதனையை ஏற்படுத்தியுள்ளது.

இந்த வழக்கைப் பொறுத்தவரை, பாதிக்கப்பட்ட சிறுமி மற்றும் அவரது தாயின் வாக்குமூலங்கள் விரைவில் நீதிமன்றத்தில் பதிவு செய்யப்படும் என்று மூத்த காவல்துறை அதிகாரி தெரிவித்துள்ளார். குற்றவாளிகளுக்குக் கடுமையான தண்டனையை விரைவாகப் பெற்றுத் தருவதை உறுதி செய்யும் வகையில் விசாரணை முடுக்கிவிடப்பட்டுள்ளது. போதைக்கு அடிமையானவர்களின் இத்தகைய மிருகத்தனமான செயல்கள் சமூகப் பாதுகாப்பிற்கு பெரும் அச்சுறுத்தலாக மாறியுள்ளதாகச் சமூக ஆர்வலர்கள் கவலை தெரிவித்துள்ளனர்.