“ஒரு கப் டீ.. ஒரு கொலை!”… தனிமையில் இருக்கும் பெண்களை மகனுடன் சேர்ந்து வேட்டையாடிய சைக்கோ தாய்… தெலங்கானாவை உலுக்கிய லேடி சீரியல் கில்லர்…!!

தெலங்கானா மாநிலம் சித்திபேட் பகுதியில், மளிகை மற்றும் டீக்கடை நடத்தி வந்த ரஜிதா என்ற பெண்ணும் அவரது மைனர் மகனும் இணைந்து, ஆதரவின்றித் தனியாக வசிக்கும் பெண்களைக் குறிவைத்துத் தொடர் கொலை மற்றும் கொள்ளை சம்பவங்களில் ஈடுபட்டது போலீஸ் விசாரணையில் அம்பலமாகியுள்ளது. கடந்த ஆகஸ்ட் மாதம் ராமக்கபேட் பகுதியில் விஜயா என்பவரின் பாதி எரிந்த உடலை போலீசார் மீட்டனர். பின்னர், சிசிடிவி காட்சிகள் மற்றும் தீவிர விசாரணையின் அடிப்படையில், ரஜிதாவும் அவரது மகனும் விஜயாவை மூச்சுத்திணறச் செய்து கொன்று, நகைகளைக் கொள்ளையடித்தபின் சடலத்தை பைக்கில் கொண்டுசென்று எரித்தது கண்டுபிடிக்கப்பட்டு இருவரும் கைது செய்யப்பட்டனர்.

இவர்கள் தங்களது கடைக்கு வரும் வாடிக்கையாளர்களின் குடும்பப் பின்னணியை நோட்டமிட்டு, குடும்பப் பிரச்சனை உள்ளவர்கள் அல்லது தனிமையில் இருப்பவர்களை மட்டுமே திட்டமிட்டுக் குறிவைத்துள்ளனர்; இதன் மூலம் கொலையின் மீதான சந்தேகம் மற்றவர்கள் மீது திரும்பும் என தப்புக் கணக்கு போட்டுள்ளனர். இதற்கு முன்பாகவே ரேகா என்ற பெண்ணைக் கொன்று உடலை வனப்பகுதியில் எரித்ததும், நடைப்பயிற்சி சென்ற அன்னபூர்ணா என்பவரைத் தாக்கி தாலியைப் பறித்ததும், சொந்தக் கணவர் உட்பட மேலும் நான்கு பேரைக் கொல்லத் திட்டமிட்டிருந்த அதிர்ச்சியூட்டும் தகவல்களும் வெளிவந்துள்ளன. குற்றவாளிகளிடமிருந்து பணம், நகைகள் மற்றும் இருசக்கர வாகனத்தைப் பறிமுதல் செய்த காவல் துறையினர், ரஜிதாவைச் சிறையிலும், அவரது மகனைச் சிறுவர் சீர்திருத்த இல்லத்திலும் அடைத்துள்ளனர்.