குழந்தைக்காக தனது மனைவியை கூலிப்படை வைத்து கடத்திய கணவன்… பிரபல சீரியல் நடிகைக்கு நடந்த கொடுமை!

கன்னடத்தில் டிவி சீரியல்களில் பிரபல நடிகையாக இருப்பவர் சைத்ரா. அவரது கணவர் ஹர்ஷவர்தன். அவர் தயாரிப்பாளராக உள்ளார். கடந்த 2023ம் ஆண்டில் ஹர்ஷவர்தனுக்கும் சைத்ராவுக்கும் திருமணம் நடந்த நிலையில் அவர்களுக்கு ஒரு பெண் குழந்தை உள்ளது. கருத்து வேறுபாடு காரணமாக நடிகை சைத்ரா தனது கணவரை பிரிந்து வாழ்ந்து வருகிறார்.

இந்நிலையில் நடிகை சைத்ராவை அவரது கணவர் ஹர்ஷவர்தன் காரில் கடத்திச் சென்றுள்ளார். மைசூருக்கு படப்பிடிப்புக்கு செல்வதாக வீட்டில் சொல்லிவிட்டு சைத்ரா சென்ற நிலையில், அவரை ஹர்ஷவர்தன் கூலிப்படை வைத்து காரில் கடத்தியதாக கூறப்படுகிறது. சைத்ரா கடத்தப்பட்ட நிலையில் பல மணி நேரத்துக்கு பிறகு சைத்ரா எப்படியோ அவரது நண்பருக்கு போன் செய்து இதை தெரிவித்துள்ளார்.

அந்த நண்பர், சைத்ராவின் குடும்பத்தினருக்கு இந்த தகவலை உடனே சொல்லி இருக்கிறார். இதையடுத்து சைத்ராவின் குடும்பத்தினர் போலீசில் புகார் அளித்தனர். இந்த நிலையில் சைத்ராவின் அம்மாவுக்கு போன் செய்த ஹர்ஷவர்தன், தங்களது ஒரு வயது பெண் குழந்தையை கொண்டு வந்து கொடுத்தால் தான், சைத்ராவை விடுவிப்பேன் என்று மிரட்டியதாக தகவல் வெளியாகி உள்ளது.குழந்தைக்காக கணவரே தனது மனைவியை கடத்தியது பெரும் பரபரப்பை ஏற்படுத்தி உள்ளது.