“சீனியர்களுக்கு நோ… செந்தில் பாலாஜிக்கு மட்டும் எஸ்”…. ஸ்டாலின் கொடுத்த ‘ஸ்பெஷல் ஆஃபர்’…. அறிவாலயத்தில் வெடித்த ரகசிய பிளான்….!

திமுகவில் கட்சி அமைப்புகளைப் பலப்படுத்தும் நோக்கில் தீவிர மறுசீரமைப்பு நடவடிக்கைகள் மேற்கொள்ளப்பட்டு வருகின்றன. சீனியர்களை ஓரங்கட்டிவிட்டு, இளைஞர்களுக்கு அதிக வாய்ப்பளிக்கும் வகையில், இதுவரை 78 ஆக இருந்த திமுகவின் வருவாய் மாவட்டங்கள் தற்போது 110 ஆக பிரிக்கப்பட்டு அறிவிக்கப்பட்டுள்ளன. பெரும்பாலும் இரண்டு சட்டமன்றத் தொகுதிகளுக்கு ஒரு மாவட்டச் செயலாளர் என்ற அடிப்படையில் இந்த மாற்றம் செய்யப்பட்டுள்ளது. இதன் காரணமாக, 70 வயதைக் கடந்த 13 முன்னாள் அமைச்சர்கள் மற்றும் மூன்று முறைக்கு மேலாக மாவட்டச் செயலாளர்களாகப் பணியாற்றிய 4 நிர்வாகிகள் தங்கள் பதவிகளை இழக்கும் சூழல் உருவாகியுள்ளது.

பதவியை இழக்கும் சீனியர் நிர்வாகிகள் சிலர் மு.க.ஸ்டாலினை நேரில் சந்தித்து முறையிட்டபோதிலும், “கட்சியின் எதிர்கால நலனைக் கருத்தில் கொண்டு இதனை நீங்கள் ஏற்றுக்கொண்டுதான் ஆக வேண்டும்” என அவர் கறாராகக் கூறிவிட்டதாகத் தெரிகிறது. தலைமையின் இந்த அதிரடி முடிவால் சீனியர்கள் அமைதி காக்க வேண்டிய நிலைக்குத் தள்ளப்பட்டுள்ளனர். எனினும், இந்த அதிரடி மாற்றங்களுக்கு மத்தியில், முன்னாள் அமைச்சர் செந்தில் பாலாஜிக்கு மட்டும் தலைமை தரப்பில் ஒரு சிறப்புச் சலுகை வழங்கப்பட்டிருப்பதாகக் கசியும் தகவல்கள் அறிவாலய வட்டாரத்தில் பெரும் பரபரப்பை ஏற்படுத்தியுள்ளன.

முன்பு கரூர் மாவட்டச் செயலாளராகப் பணியாற்றிய செந்தில் பாலாஜியிடம், “கரூர் அல்லது கோவை — இந்த இரண்டில் உங்களுக்கு எந்த மாவட்டம் வேண்டும் என்பதை நீங்களே தேர்வு செய்து சொல்லுங்கள்” என்று ஸ்டாலின் தரப்பில் ஆஃபர் கொடுக்கப்பட்டுள்ளதாகக் கூறப்படுகிறது. தற்போது கரூர் மாவட்டம் கிழக்கு, மேற்கு என இரண்டாகப் பிரிக்கப்பட்டுள்ள நிலையில், கோவை தெற்கு தொகுதி சட்டமன்ற உறுப்பினராகவும் செந்தில் பாலாஜி வகிக்கும் முக்கியத்துவமே இந்தச் சிறப்பு ஆஃபருக்குக் காரணமாகப் பார்க்கப்படுகிறது. அனைவருக்கும் கறார் காட்டும் தலைமை, செந்தில் பாலாஜிக்கு மட்டும் இப்படி ஒரு வாய்ப்பை வழங்கியிருப்பது கட்சிப் மூத்த நிர்வாகிகள் மத்தியில் ஆச்சரியத்தை ஏற்படுத்தியுள்ளது.

தற்போது கரூரில் விரைவாக இடைத்தேர்தல் வரவிருக்கும் சூழலில், மீண்டும் கரூர் மாவட்டச் செயலாளர் பொறுப்பையே கோருவதா அல்லது கொங்கு மண்டலத்தில் கட்சியின் செல்வாக்கை மேலும் உயர்த்த கோவை மாவட்டப் பொறுப்பை ஏற்பதா என்பது குறித்து செந்தில் பாலாஜி தீவிரமாக ஆலோசித்து வருகிறார். இந்த நகர்வின் மூலம், செந்தில் பாலாஜிக்கும் திமுக தலைமைக்கும் இடையே கருத்து வேறுபாடுகள் நிலவுவதாக உலா வந்த வதந்திகளுக்கு முற்றிலும் முற்றுப்புள்ளி வைக்கப்பட்டுள்ளதாக அரசியல் நோக்கர்கள் கருதுகின்றனர்.