தமிழ்நாடு சட்டமன்றத்தில் மின்சாரத்துறை மீதான மானியக் கோரிக்கை விவாதத்தின் போது, அமைச்சர் சி.டி.ஆர். நிர்மல் குமார் உரையாற்றியதைத் தொடர்ந்து, முன்னாள் அமைச்சரும் திமுக எம்.எல்.ஏ-வுமான வி. செந்தில் பாலாஜி மின்சாரத் துறையின் செயல்பாடுகள் மற்றும் கொள்கை விளக்கக் குறிப்பு குறித்து மிகக் கடுமையான விமர்சனங்களை முன்வைத்தார். 2025-26ஆம் ஆண்டுக்கான மின்சாரத்துறை கொள்கை விளக்கக் குறிப்பில் சில பக்கங்களில் உள்ள தரவுகளை மட்டும் மாற்றிவிட்டு, திமுக ஆட்சிக் காலத்தில் தயாரிக்கப்பட்ட அறிக்கையை அப்படியே அமைச்சர் நகலெடுத்துள்ளதாக அவர் குற்றம்சாட்டினார். மேலும், அவைக்குறிப்பில் இருந்து கருத்துகளை நீக்குவது குறித்துப் பேசிய அவர், பதில் சொல்லாமல் அமைதியாக இருப்பதற்குத் தாங்கள் சட்டமன்றத்திற்கு வரவில்லை என்று ஆவேசமாகத் தெரிவித்தார்.
மின்சாரத் துறையில் நிலவும் ஆட்கள் பற்றாக்குறை குறித்து அமைச்சர் தொடர்ந்து பேசி வருவதைச் சுட்டிக்காட்டிய செந்தில் பாலாஜி, அதே எண்ணிக்கையிலான ஊழியர்களை வைத்துக்கொண்டுதான் திமுக ஆட்சிக் காலத்தில் தமிழ்நாடு முழுவதும் சீரான மின் விநியோகம் வழங்கப்பட்டதாகத் தெரிவித்தார். திமுக அரசின் இந்தச் சிறப்பான செயல்பாட்டிற்காக மத்திய அரசிடமிருந்து பாராட்டுக்கள் பெறப்பட்டதையும் அவர் நினைவுகூர்ந்தார். மேலும், திமுக ஆட்சியில் ரூ.5,066 கோடி செலவில் 122 துணை மின் நிலையங்கள் பயன்பாட்டுக்குக் கொண்டு வரப்பட்டதாகவும், தமிழக வரலாற்றிலேயே இல்லாத வகையில் 5 ஆண்டுகளில் 99 ஆயிரம் மின் மாற்றிகள் நிறுவப்பட்டதாகவும் புள்ளிவிவரங்களுடன் விளக்கினார்.
அரசு வெளியிட்ட வெள்ளை அறிக்கையில்குறிப்பிடப்பட்டுள்ள துணை மின் நிலையங்களின் பணிகள் மற்றும் உள்கட்டமைப்பு மேம்பாடுகள் குறித்துக் கேள்வி எழுப்பிய அவர், கடந்த 5 ஆண்டுகளில் புதிய மின் உற்பத்திக்கு ஏற்ப புதிய வழித்தடங்களும் வலுவான கட்டமைப்புகளும் உருவாக்கப்பட்டது திமுக ஆட்சியில்தான் என்றார். மின்சாரத் துறையில் முறைகேடுகள் நடப்பதாகப் பொதுவெளியில் அமைச்சர் தொடர்ந்து பேசி வருவதைக் குறிப்பிட்ட அவர், அது தொடர்பான சான்றுகள் மற்றும் ஹார்ட் டிஸ்க் தொடர்பான தனது கேள்விகளுக்கும் அமைச்சரிடமிருந்து தெளிவான பதில்கள் வரவில்லை என்று சாடினார்.
இரவு 10 மணிக்கு வழங்கப்பட்ட 6 துறைகளைச் சேர்ந்த 834 பக்கங்கள் கொண்ட கொள்கை விளக்கக் குறிப்பைப் படித்துத் தரவுகளைத் தயார் செய்ய நள்ளிரவு 2.30 மணி வரை ஆனதாகத் தெரிவித்த செந்தில் பாலாஜி, அதில் மின்சாரத் துறை தொடர்பான குறிப்பில் 4 முதல் 5 பக்கங்களில் மட்டுமே புதிய தரவுகள் இருப்பதாகக் கூறினார். முந்தைய ஆண்டின் புள்ளிவிவரங்களை மட்டும் நீக்கிவிட்டு, பெரும்பாலான சரத்துகள் அப்படியே நகலெடுக்கப்பட்டுள்ளதாகவும், தவெக அரசின் இரண்டு திட்டங்களை மட்டுமே புதிதாகச் சேர்த்துள்ளதாகவும் கூறி சட்டசபையில் தனது கண்டனத்தைப் பதிவு செய்தார்.