இந்திய கம்யூனிஸ்ட் கட்சியின் மூத்த தலைவர் தவெகவில் இணைந்தார்.. பனையூரை அதிரவைத்த சி. மகேந்திரனின் அரசியல் எண்ட்ரி…!!

இந்திய கம்யூனிஸ்ட் கட்சியின் மூத்த தலைவரும், தமிழகத்தின் நீண்டகால இடதுசாரி அரசியல்வாதியுமான சி. மகேந்திரன், நடிகர் விஜய் தலைமையிலான தமிழக வெற்றிக் கழகத்தில் இன்று இணைந்துள்ளார். சென்னை பனையூரில் உள்ள தவெக தலைமை அலுவலகத்தில் நடைபெற்ற நிகழ்வில், கட்சியின் பொதுச்செயலாளர் புஸ்ஸி ஆனந்த் முன்னிலையில் அவர் தனது உறுப்பினர் படிவத்தைப் பெற்று முறைப்படி கட்சியில் இணைந்தார். பல தசாப்தங்களாக கம்யூனிஸ்ட் இயக்கத்தில் தீவிரமாகப் பங்காற்றிய ஒரு மூத்த தலைவர், தற்போது புதிய அரசியல் கட்சியான தவெக-வில் இணைந்திருப்பது தமிழக அரசியல் வட்டாரத்தில் பெரும் பரபரப்பையும் கவனத்தையும் ஏற்படுத்தியுள்ளது.

சி. மகேந்திரன் தமிழகத்தின் முக்கிய அரசியல் விமர்சகராகவும், சிந்தனையாளராகவும், சிறந்த பேச்சாளராகவும் அறியப்படுபவர் ஆவார். கம்யூனிஸ்ட் கட்சியின் மாநில துணைச் செயலாளராகப் பணியாற்றிய அனுபவம் கொண்ட இவர், கொள்கை ரீதியாக வலுவான இடதுசாரிப் பின்னணியில் இருந்து தவெக-வின் புதிய அரசியலை நோக்கி நகர்ந்துள்ளார். சட்டமன்றத் தேர்தலை எதிர்கொள்ள தவெக தீவிரமாகத் தயாராகி வரும் வேளையில், இவரைப் போன்ற அனுபவமிக்க மூத்த தலைவர்களின் சேர்க்கை கட்சியின் அரசியல் வியூகங்களுக்கும், கொள்கை உருவாக்கத்திற்கும் கூடுதல் பலம் சேர்க்கும் என்று அரசியல் நோக்கர்களால் பார்க்கப்படுகிறது.