தமிழ் திரையுலகில் நகைச்சுவை மன்னர்களான கவுண்டமணி மற்றும் செந்திலுடன் இணைந்து பல படங்களில் நடித்து ரசிகர்களை மகிழ்வித்தவர் மூத்த நடிகை வாசுகி. தமிழ், தெலுங்கு, மலையாளம் எனப் பல்வேறு மொழிகளில் நூற்றுக்கும் மேற்பட்ட திரைப்படங்களில் நடித்துள்ள இவர், மறைந்த முன்னாள் முதலமைச்சர் ஜெயலலிதாவின் காலத்தில் அதிமுகவின் நட்சத்திரப் பேச்சாளராகவும் வலம் வந்தார். இருப்பினும், ஜெயலலிதாவின் மறைவுக்குப் பிறகு அரசியல் களத்திலும், திரைத்துறையிலும் இவருக்கான வாய்ப்புகள் படிப்படியாகக் குறைந்து, கடுமையான பொருளாதார நெருக்கடியில் சிக்கித் தவிக்கும் நிலைக்குத் தள்ளப்பட்டுள்ளார்.
சொந்த ஊரான காரைக்குடிக்குத் திரும்பிய பின், அன்றாட உணவிற்கே வழியின்றித் தவித்த வாசுகி, தன் கைவசம் இருந்த நகைகளான கழுத்துச் சங்கிலி, கால்கொலுசு வரை அனைத்தையும் விற்றுப் பசியைப் போக்கிக் கொண்டதாகக் கண்ணீருடன் தெரிவித்துள்ளார். இக்கட்டான சூழலில் தெலுங்கு நடிகர் சங்கம் இவருக்குக் கை கொடுத்துள்ளது. குறிப்பாக, நடிகர் மோகன் பாபுவின் மகன் விஷ்ணு மஞ்சு தன் சொந்தப் பணத்தில் இவரைச் சங்கத்தில் உறுப்பினராகச் சேர்த்ததுடன், நடிகர் சிரஞ்சீவி உள்ளிட்ட முன்னணி நடிகர்களும் நிதியுதவி செய்துள்ளனர். ஆனால், தென்னிந்திய நடிகர் சங்கத்திடமிருந்து இதுவரை எந்தவிதமான உதவியும் கிடைக்கவில்லை என்பது இவருடைய ஆதங்கமாக உள்ளது.
தற்போது கண் அறுவை சிகிச்சை முடிந்து பராமரிக்க ஆளோ, வருமானத்திற்கு வழியோ இல்லாமல் வாழும் வாசுகி, “கையில் பத்து ரூபாய் இருந்தால் மட்டுமே டீ கூட குடிக்க முடியும்; தற்போது விற்பதற்குக்கூட என்னிடம் எதுவும் இல்லை” என நெஞ்சை உருக்கும் வகையில் புலம்பியுள்ளார். ஆதரவளிக்கக் கணவனோ, குழந்தைகளோ இல்லாத நிலையில், தற்கொலை செய்துகொள்ளவும் துணிவின்றி, “எனக்குத் தங்குவதற்கு இடமும், பிழைப்புக்கு ஏதேனும் வேலையும் கொடுத்து உதவுங்கள்” என நடிகர் சங்க நிர்வாகிகளான நாசர் மற்றும் விஷாலிடம் கண்ணீர் மல்கக் கோரிக்கை விடுத்துள்ளார். ஒரு காலத்தில் திரையில் பலரைச் சிரிக்க வைத்த ஒரு மூத்த நடிகை, இன்று பசி கொடுமையால் நடுரோட்டில் நின்றுகொண்டு உதவி கேட்கும் நிலை அனைவரையும் பெரும் சோகத்தில் ஆழ்த்தியுள்ளது.