தமிழகத்தில் 2026 ஆம் ஆண்டு சட்டமன்றத் தேர்தல் நெருங்கிக் கொண்டிருக்கும் சூழலில் அனைத்து அரசியல் கட்சிகளும் தீவிரமாக தேர்தல் பணியில் ஈடுபட்டு வருகின்றன. அதே சமயம் கூட்டணி குறித்த பேச்சுவார்த்தையும் மும்முரமாக நடந்து கொண்டிருக்கிறது. இதனிடையே அதிமுக பாஜகவுடன் கூட்டணி வைத்துள்ளதால் இபிஎஸ் மீது அதிருப்தியில் இருக்கும் கட்சி நிர்வாகிகள் பலரும் அடுத்தடுத்து விலகி வருகின்றன. அதேசமயம் சமீபத்தில் செங்கோட்டையன் அதிமுகவை மீண்டும் ஒன்று இணைக்க வேண்டும் என்று கூறி இபிஎஸ்-க்கு 10 நாட்கள் கெடு விதித்திருந்த நிலையில் அவரை கட்சியிலிருந்து ஒட்டுமொத்தமாக நீக்கி இபிஎஸ் உத்தரவிட்டார். இதனைத் தொடர்ந்து செங்கோட்டையன் டெல்லி சென்று அமித்ஷாவை நேரில் சந்தித்து பேசி இருந்தார். அதேசமயம் செங்கோட்டையனின் அடுத்த கட்ட நகர்வு என்ன என்பது தமிழக அரசியலில் உன்னிப்பாக கவனிக்கப்படுகிறது.
இந்நிலையில் செங்கோட்டையன் சென்னை விமான நிலையத்தில் செய்தியாளர்களை இன்று சந்தித்து பேசியபோது, எந்த அரசியல் தலைவர்களையும் தான் சந்திக்கவில்லை என்றும் ஒரு திருமண விழாவுக்காகவே சென்னை வந்துள்ளதாகவும் தெரிவித்துள்ளார். ஓபிஎஸ் மற்றும் டிடிவி தினகரன் ஆகியோரின் சந்திப்பு குறித்த கேள்விக்கு பதில் அளித்த அவர், அனைவரும் ஒன்றிணைந்து செயல்பட வேண்டும், ஒன்றிணைந்து வெற்றி பெற வேண்டும் என்பதே எனது விருப்பம் எனக் கூறி மீண்டும் பரபரப்பை கிளப்பி உள்ளார். ஏற்கனவே பிரித்து கிடக்கும் அதிமுகவினர் அனைவரும் ஒன்றிணைய வேண்டும் என்று கூறியதால் இபிஎஸ் செங்கோட்டையனை அதிமுகவிலிருந்து நீக்கியது குறிப்பிடத்தக்கது.