“லீடர்.. லீடர்னு கைகட்டி நின்னவன் இப்போ பேசுறான்!”… ஆதவ் அர்ஜுனாவை லெப்ட்-ரைட் வாங்கிய சேகர் பாபு… பரபரக்கும் அரசியல் களம்…!!!

தமிழக வெற்றிக் கழகத்தின் (தவெக) மாநிலப் பொதுச்செயலாளர் ஆதவ் அர்ஜுனாவுக்கும், திமுகவுக்கும் இடையிலான அரசியல் மோதல் தற்போது உச்சக்கட்டத்தை எட்டியுள்ளது. சமீபத்தில் செய்தியாளர்களிடம் பேசிய இந்து சமய அறநிலையத்துறை அமைச்சர் சேகர் பாபு, ஆதவ் அர்ஜுனாவை மிகக் கடுமையான வார்த்தைகளால் விமர்சித்துள்ளார். பணம் இருக்கிறது என்பதற்காக எதையும் விலை கொடுத்து வாங்கிவிடலாம் என்ற மமதையில் இருப்பவர்களுக்கு, வரும் தேர்தலில் வில்லிவாக்கம் தொகுதியில் திமுக தக்க பாடம் புகட்டும் என்று அவர் சவால் விடுத்துள்ளார்.

ஆதவ் அர்ஜுனாவின் கடந்த கால அரசியல் செயல்பாடுகளைச் சுட்டிக்காட்டிய சேகர் பாபு, “ஒரு காலத்தில் எங்களைப் பார்த்து ‘லீடர்.. லீடர்..’ என்று கைகட்டி நின்று கொண்டிருந்தவர், இன்று எங்களது இயக்கத்தின் அறிவைப் பற்றிப் பேசுகிறார்” என்று சாடினார். அத்தகைய நபர்கள் தங்களது அறிவைப் பரிசோதனை செய்துகொள்ள சரியான இடம் கீழ்ப்பாக்கம் மனநல மருத்துவமனைதான் என்றும் அவர் காட்டமாகத் தெரிவித்தார். மேலும், திமுகவைப் போன்ற ஒரு பவள விழா கண்ட பேரியக்கத்தை, இப்போதுதான் முளைத்துள்ள ‘பால்வாடி’ இயக்கமான தவெக விமர்சிப்பது வேடிக்கையாக இருப்பதாகவும் அவர் கூறினார்.

சமீபகாலமாக நடிகர் ரஜினிகாந்த் அரசியலுக்கு வராமல் தடுத்தது திமுகதான் என்று ஆதவ் அர்ஜுனா முன்வைத்த குற்றச்சாட்டையும் சேகர் பாபு வன்மையாக மறுத்துள்ளார். இந்த விவகாரத்தில் ரஜினிகாந்தின் தெளிவான விளக்கத்திற்குப் பிறகு ஆதவ் அர்ஜுனா மன்னிப்பு கோரியிருந்தாலும், தொடர்ந்து திமுக மீது வன்மத்தைக் கக்கி வருவதாக அமைச்சர் குற்றம்சாட்டினார். அதிகாரம் கைக்கு வருவதற்கு முன்பே இவ்வளவு திமிருடன் பேசுபவர்களை மக்கள் ஒருபோதும் ஏற்றுக்கொள்ள மாட்டார்கள் என்பது சேகர் பாபுவின் வாதமாக இருந்தது.