“என்ன நினைச்சுட்டிருக்கிங்க”… திமுக திட்டங்களுக்கு ‘ரெட் கார்டு’ போட்ட தவெக அரசு?… ரூ.800 கோடி முடக்கம்… கல்வெட்டுகள் அகற்றம்… கொதித்தெழுந்த முன்னாள் அமைச்சர்…!

தமிழகத்தில் அண்மையில் நடைபெற்ற சட்டமன்றத் தேர்தலில் திமுக மற்றும் அதிமுக கூட்டணிகளை வீழ்த்தி, தமிழக வெற்றிக் கழகம் (தவெக) ஆட்சியைப் பிடித்துள்ள சூழலில், இரு கட்சிகளுக்கும் இடையே அரசியல் மோதல் நாளுக்கு நாள் தீவிரமடைந்து வருகிறது. குறிப்பாக, முந்தைய திமுக அரசின் மக்கள் நலத்திட்டங்களைத் தற்போதைய தவெக அரசு முடக்கி வருவதாகவும், திட்டங்களின் பெயர்களை மாற்றி வருவதாகவும் திமுக தரப்பில் கடுமையான புகார்கள் எழுப்பப்பட்டு வருகின்றன. இந்த அரசியல் பரபரப்புக்கு இடையே, சென்னையில் செய்தியாளர்களைச் சந்தித்த திமுக முன்னாள் அமைச்சர் சேகர்பாபு, தவெக அரசு காழ்ப்புணர்ச்சியோடு செயல்படுவதாகக் குற்றம் சாட்டியுள்ளார்.

செய்தியாளர் சந்திப்பில் பேசிய சேகர்பாபு, “சென்னையின் வளர்ச்சி பணிகளுக்காக, முந்தைய திமுக ஆட்சியில் சென்னை பெருநகர வளர்ச்சி குழுமம் மூலம் கொண்டு வரப்பட்ட ரூ.800 கோடிக்கும் மேலான திட்டங்களைத் தவெக அரசு ரத்து செய்துள்ளது” என்று பரபரப்பு புகார் ஒன்றை முன்வைத்தார். மேலும், ஏழை எளிய மக்களின் அன்றாட வாழ்வோடு பின்னிப்பிணைந்த ‘வட சென்னை வளர்ச்சி திட்டம்’ நிதி நெருக்கடியைக் காரணம் காட்டி முடக்கப்பட்டுள்ளதாகவும் சாடினார். நூலகங்கள், விளையாட்டு மைதானங்கள், பூங்காக்கள், கழிவுநீர் ஏற்று மையங்கள் மற்றும் மின்சாரத் திட்டங்கள் போன்ற மக்கள் பயன்பாட்டுப் பணிகளுக்கு முட்டுக்கட்டை போடுவதை விடுத்து, தவெக அரசு உடனடியாக அவற்றை மக்கள் பயன்பாட்டிற்கு கொண்டு வர வேண்டும் என்றும் அவர் வலியுறுத்தினார்.

திமுக ஆட்சியில் கொண்டு வரப்பட்ட திட்டங்களின் கல்வெட்டுகளை அகற்றி, பெயர்களை மாற்றுவது ஜனநாயகத்திற்கு எதிரானது என்றும் சேகர்பாபு சாடினார். ராயபுரம் மண்டலம் 5-ல் உள்ள முதலமைச்சர் திருமண மாளிகையில் பதிக்கப்பட்ட கல்வெட்டுகள் மற்றும் முன்னாள் துணை முதலமைச்சரால் திறந்து வைக்கப்பட்ட கல்வெட்டுகளை அகற்றுவதன் மூலம் திமுக தலைவர்களின் புகழை மறைத்துவிட முடியாது என்று தெரிவித்த அவர், “கல்வெட்டுகளை வேண்டுமானால் நீங்கள் அகற்றலாம், ஆனால் மக்களின் மனம் என்ற சிம்மாசனத்தில் வீற்றிருக்கும் எங்கள் தலைவர்களின் பெயரை எதை வைத்து அகற்றுவீர்கள்?” என்று கேள்வி எழுப்பினார். தவெக அரசின் இந்த மக்கள் விரோத மற்றும் காழ்ப்புணர்ச்சி நடவடிக்கைகளை மக்கள் உற்று கவனித்து வருவதாகவும், உரிய நேரத்தில் மக்கள் இதற்கு தகுந்த பதிலடி கொடுப்பார்கள் என்றும் அவர் எச்சரித்துள்ளார்.