அடுத்த ஷாக்…. சீமான் போட்ட மெகா ஸ்கெட்ச்… இடையில் புகுந்து சின்னத்தை அள்ளிய ராமதாஸ் அத்வாலே…. பரபரக்கும் தமிழக அரசியல்….!

2026 தமிழக சட்டமன்றத் தேர்தல் நெருங்கி வரும் வேளையில், நாம் தமிழர் கட்சியின் ஒருங்கிணைப்பாளர் சீமானுக்குச் சின்னம் தொடர்பான புதிய சிக்கல் எழுந்துள்ளது. கடந்த தேர்தல்களில் ‘கரும்பு விவசாயி’ சின்னத்தில் போட்டியிட்டு வந்த நிலையில், தற்போது இந்திய குடியரசு கட்சி அதே சின்னத்தைக் கோரியிருப்பது அரசியல் வட்டாரத்தில் பெரும் பரபரப்பை ஏற்படுத்தியுள்ளது.

மத்திய அமைச்சர் ராமதாஸ் அத்வாலே தலைமையிலான இந்திய குடியரசு கட்சி, வரும் தேர்தலில் தமிழகத்தின் 51 தொகுதிகளில் ‘கரும்பு விவசாயி’ சின்னத்தில் போட்டியிடப் போவதாக அறிவித்துள்ளது. நாம் தமிழர் கட்சி தற்போது ‘ஏர் கலப்பையுடன் இருக்கும் விவசாயி’ என்ற புதிய சின்னத்தை அங்கீகரிக்கப்பட்ட சின்னமாகப் பெற்றுள்ள போதிலும், பழைய சின்னமான ‘கரும்பு விவசாயி’ வேறொரு கட்சிக்கு ஒதுக்கப்படுவது வாக்காளர்கள் மத்தியில் குழப்பத்தை ஏற்படுத்தும் என அஞ்சப்படுகிறது.

குறிப்பாக, கிராமப்புற மற்றும் முதிய வாக்காளர்கள் மத்தியில் சின்னம் என்பது ஒரு கட்சியின் முக்கிய அடையாளமாகப் பார்க்கப்படுகிறது. ஒரே மாதிரியான பெயரைக் கொண்ட இரண்டு வெவ்வேறு விவசாயி சின்னங்கள் களத்தில் இருக்கும்போது, அது நாம் தமிழர் கட்சியின் வாக்கு வங்கியில் சிதறலை ஏற்படுத்தக்கூடும் என்று அரசியல் விமர்சகர்கள் கருதுகின்றனர். ஏற்கனவே நடிகர் விஜய்யின் தமிழக வெற்றிக் கழகத்தின் வருகையால் இளைஞர் வாக்குகள் பிரியும் சூழலில், இந்தச் சின்னப் போட்டி சீமானுக்குப் கூடுதல் நெருக்கடியைத் தந்துள்ளது.

இந்தச் சிக்கலைத் தவிர்க்க, சீமான் தரப்பிலிருந்து ராமதாஸ் அத்வாலேவிடம் பேச்சுவார்த்தை நடத்த முயற்சிகள் மேற்கொள்ளப்பட்டு வருவதாகத் தகவல்கள் கசிந்துள்ளன. தமிழகத்தில் இந்திய குடியரசு கட்சி போட்டியிடுவதைத் தவிர்க்கவோ அல்லது சின்னத்தை மாற்றிக்கொள்ளவோ கோரிக்கை வைக்கப்படலாம் எனத் தெரிகிறது. எனினும், தேர்தல் களத்தில் இந்தச் சின்னப் போர் சீமானின் அரசியல் நகர்வுகளில் ஒரு முக்கிய சவாலாக உருவெடுத்துள்ளது.