பயம்காட்டுனா பயந்துருவோமா..? ட்ரோன் தாக்குதல் பீதிக்கு மத்தியில் ‘சீக்ரெட்’ மிஷன்… உக்ரைன் அச்சுறுத்தலையும் மீறி ரஷ்யா அதிரடி…!!

உக்ரைன் உடனான போர்ச் சூழல் மற்றும் தொடர் ட்ரோன் தாக்குதல் அச்சுறுத்தல்களுக்கு மத்தியிலும், ரஷ்யா தனது ராணுவ வலிமையை நிரூபிக்கும் வகையில் இன்று (ஏப். 17) வெற்றிகரமாக ராக்கெட்டை ஏவியுள்ளது. ரஷ்யாவின் வடக்குப்பகுதியில் உள்ள பிளெசெட்ஸ்க் (Plesetsk) ஏவுதளத்திலிருந்து, அந்நாட்டின் பாதுகாப்பு அமைச்சகத்திற்குச் சொந்தமான அதிநவீன செயற்கைக்கோளை சுமந்தபடி ‘சோயுஸ்-2.1பி’ (Soyuz-2.1b) ராக்கெட் விண்ணில் பாய்ந்தது. உக்ரைன் எல்லைகளில் இருந்து வரும் பாதுகாப்பு அச்சுறுத்தல்களைக் கருத்தில் கொண்டு, ஏவுதளம் முழுவதும் பலத்த பாதுகாப்பு வளையத்திற்குள் கொண்டுவரப்பட்டு இந்த ஏவுதல் பணி மிக ரகசியமாகவும் துல்லியமாகவும் திட்டமிடப்பட்டது.

இந்த ஏவுதல் குறித்து கருத்து தெரிவித்த ரோஸ்கோஸ்மோஸ் விண்வெளி நிறுவனத்தின் தலைவர் டிமிட்ரி பகானோவ், உக்ரைனின் சீண்டல்கள் மற்றும் இடையூறுகளை முறியடித்து, திட்டமிட்டபடி ராக்கெட் அதன் இலக்கை எட்டியதாகக் குறிப்பிட்டார். “அச்சுறுத்தல்கள் எங்களை முடக்க முடியாது” என்பதை இந்த வெற்றி உலகிற்கு உணர்த்தியுள்ளதாக அவர் தெரிவித்தார். விண்ணில் செலுத்தப்பட்ட இந்த செயற்கைக்கோள், ரஷ்யாவின் பாதுகாப்பு மற்றும் எல்லைக் கண்காணிப்பு பணிகளுக்குப் பெரிதும் வலுசேர்க்கும் என எதிர்பார்க்கப்படுகிறது.