“அம்பானியா கொக்கா?… 25% வரியை 2.5% ஆக மாற்றிய ரகசிய பிசினஸ் அம்பலமானது… ‘ஆர்சிடிஎல்’ மாஸ்டர் பிளான்..!!!”

முகேஷ் அம்பானியின் ரிலையன்ஸ் இண்டஸ்ட்ரீஸ் நிறுவனம், தனது குழுமத்தைச் சேர்ந்த ‘ரிலையன்ஸ் கமர்ஷியல் டீலர்ஸ்’ (RCDL) நிறுவனத்திற்கு 2025 நிதியாண்டில் மட்டும் சுமார் 1,100 கோடி ரூபாய் வாடகையாகச் செலுத்தியுள்ளது. தனிப்பட்ட முறையில் பிரைவேட் ஜெட் வாங்கினால் விதிக்கப்படும் 25 சதவீத இறக்குமதி வரியைத் தவிர்க்க, ஆர்சிடிஎல் நிறுவனத்தை ஒரு போக்குவரத்து மற்றும் லாஜிஸ்டிக்ஸ் நிறுவனமாக (NSOP அனுமதி பெற்று) ரிலையன்ஸ் பதிவு செய்துள்ளது. இதன் மூலம் வெறும் 2.5 முதல் 5 சதவீத வரிச் சலுகையில் விமானங்களை இறக்குமதி செய்து, அவற்றை ரிலையன்ஸ் இண்டஸ்ட்ரீஸ் நிறுவனத்திற்கு வாடகைக்கு விடுவதன் மூலம் பெரும் வரிச் சேமிப்பை ரிலையன்ஸ் உறுதி செய்கிறது.

தற்போது ஆர்சிடிஎல் நிறுவனம் 500 மில்லியன் டாலர் மதிப்பிலான நவீன விமானப் படையைக் கொண்டுள்ளது. இதில் பாம்பார்டியர் குளோபல் 7500, எம்பிரேயர் ERJ-135, மற்றும் ‘பறக்கும் அரண்மனை’ என்று அழைக்கப்படும் போயிங் 737-700 பிபிஜே உள்ளிட்ட சொகுசு விமானங்கள் மற்றும் சிகார்ஸ்கி ஹெலிகாப்டர்கள் இடம்பெற்றுள்ளன. இவை அம்பானி குடும்பத்தினர் மட்டுமின்றி, ரிலையன்ஸ் குழுமத்தின் உயர்மட்ட அதிகாரிகளின் வர்த்தகப் பயணங்களுக்கும் பயன்படுத்தப்படுகின்றன. மும்பை விமான நிலையத்தில் தனி ஹேங்கர்கள் மற்றும் ஜாம்நகர் விமான நிலையத்தின் சிவில் பகுதியை நிர்வகிக்கும் வசதி கொண்டிருப்பதால், மற்ற ஜெட்கள் போல் காத்திருக்காமல் மிக வேகமாகப் பயணிக்க இவர்களால் முடிகிறது.

இந்த விமானப் பயணங்கள் வெறும் ஆடம்பரத்திற்காக மட்டுமின்றி, ரிலையன்ஸ் நிறுவனத்தின் முக்கிய வர்த்தக உத்தியாகவும் பார்க்கப்படுகிறது. அம்பானியின் விமானம் சீனா நோக்கிப் பறந்தால் புதுப்பிக்கத்தக்க எரிசக்தி ஒப்பந்தம் என்றும், வளைகுடா நாடுகளுக்குச் சென்றால் பெரும் முதலீட்டு ஒப்பந்தம் என்றும் பங்குச்ந்தை வட்டாரங்கள் கணிக்கும் அளவிற்கு இது முக்கியத்துவம் பெற்றுள்ளது. இதன் மூலம் மூன்று கண்டங்களுக்கு மூன்று நாட்களில் சென்று வரக்கூடிய வேகமான போக்குவரத்து வசதி அவர்களுக்குக் கிடைக்கிறது.

உலக அளவில் எலான் மஸ்க் போன்ற பெரும் தொழிலதிபர்களின் விமான இயக்கங்கள் எவ்வாறு பங்குச்ந்தையில் தாக்கத்தை ஏற்படுத்துகிறதோ, அதேபோல் அம்பானியின் விமானப் பயணங்களும் முதலீட்டாளர்களால் கூர்ந்து கவனிக்கப்படுகின்றன. டெக்சாஸிலிருந்து வாஷிங்டனுக்கோ அல்லது ஐரோப்பாவுக்கோ மஸ்க் பயணிப்பதை வைத்து பெரிய மாற்றங்கள் கணிக்கப்படுவது போலவே, ரிலையன்ஸ் விமானங்களின் பயணத் திசையும் வர்த்தக உலகில் ஒரு முக்கியமான குறியீடாக (Indicator) மாறியுள்ளது. ஒரு பாக்கெட்டில் இருந்து இன்னொரு பாக்கெட்டுக்கு பணம் மாறும் இந்த ‘டிரான்ஸ்பர் பிரைசிங்’ முறை, ரிலையன்ஸின் லாஜிஸ்டிக்ஸ் வலிமையை உலகத்தரத்திற்கு உயர்த்தியுள்ளது.