“அரசியலில் நாங்கதான் ‘OG’!… சச்சின் ரெக்கார்டையே பிரேக் பண்ணுவோம்!… புதுக்கோட்டையில் ஸ்டாலின் மாஸ் ஸ்பீச்”…!!!

தமிழக சட்டமன்றத் தேர்தல் வரும் ஏப்ரல் 23-ஆம் தேதி நடைபெற உள்ள நிலையில், திமுக தலைமையிலான மதச்சார்பற்ற முற்போக்குக் கூட்டணி வேட்பாளர்களை ஆதரித்து முதலமைச்சர் மு.க. ஸ்டாலின் இன்று புதுக்கோட்டையில் தீவிரப் பிரச்சாரத்தில் ஈடுபட்டார். இத்தேர்தலில் திமுக 164 தொகுதிகளில் நேரடியாகவும், கூட்டணிக் கட்சிகள் உட்பட மொத்தம் 176 வேட்பாளர்கள் ‘உதயசூரியன்’ சின்னத்திலும் போட்டியிடுகின்றனர். பொதுக்கூட்டத்தில் பேசிய முதல்வர், கிரிக்கெட்டில் சச்சின் டெண்டுல்கர் படைத்த சாதனைகளைப் போல, அரசியலில் முறியடிக்க முடியாத பல சாதனைகளை திமுக செய்துள்ளது என்றும், இனிவரும் காலங்களிலும் அந்த சாதனைகளைத் தொடருவோம் என்றும் பெருமிதத்துடன் குறிப்பிட்டார்.

மக்களுக்கான முன்னோடித் திட்டங்களைச் செயல்படுத்துவதில் திமுகதான் உண்மையான “OG” (Original Gangster) என்று குறிப்பிட்ட ஸ்டாலின், தமிழகத்தின் திட்டங்களைப் பார்த்துதான் மத்திய அரசே காப்பி அடித்து வருவதாகச் சாடினார். குறிப்பாக, மகளிர் தங்களுக்குத் தேவையான பொருட்களை வாங்குவதற்காக வழங்கப்பட உள்ள ரூ.8,000 மதிப்பிலான கூப்பன் திட்டம் குறித்துப் பேசிய அவர், பெண்கள் தங்களுக்குப் பிடித்த பிராண்டுகளைத் தங்களின் விருப்பப்படியே வாங்கிக் கொள்ளலாம் என்றும், இதற்கு யாரிடமும் அனுமதி கேட்கத் தேவையில்லை என்றும் கலகலப்பாகத் தெரிவித்தார்.

எதிர்க்கட்சித் தலைவர் எடப்பாடி பழனிசாமியின் விமர்சனங்களுக்குப் பதிலடி கொடுத்த முதல்வர், தான் கொரோனாவிலேயே மறைந்திருக்க வேண்டும் என வன்மத்துடன் பழனிசாமி பேசியதாகக் குறிப்பிட்டார். “பழனிசாமி அவர்களே, இந்த ஸ்டாலின் இன்னும் மக்களுக்காகப் ஏராளமான திட்டங்களைச் செய்யப் போகிறான்; அதை நீங்களும் பார்க்கத்தான் போகிறீர்கள்” என்று ஆவேசமாக முழங்கினார். அனல் பறக்கும் இந்தத் தேர்தல் பிரச்சாரம் புதுக்கோட்டை மக்களிடையே பெரும் வரவேற்பைப் பெற்றுள்ளது.