“ஓடும் ஆட்டோவில் கதறிய மாணவி”…. பள்ளிக்கு செல்லும் வழியில் நடந்த கொடூரம்…. ஆட்டோ ஓட்டுனரின் வெறிச்செயல்….!

திருவள்ளூர் மாவட்டம் திருவொற்றியூரில் பள்ளிக்குச் சென்ற 12 வயது சிறுமியிடம் ஆட்டோ ஓட்டுநர் பாலியல் அத்துமீறலில் ஈடுபட்ட சம்பவம் பெரும் பரபரப்பை ஏற்படுத்தியுள்ளது. திருவொற்றியூர் குப்பத்தைச் சேர்ந்த அந்தச் சிறுமி, வழக்கம்போல பள்ளிக்குச் செல்ல ஷேர் ஆட்டோவில் ஏறியுள்ளார். அப்போது ஆட்டோவில் பயணிகள் யாரும் இல்லாத சூழலைப் பயன்படுத்திக் கொண்ட ஓட்டுநர், சிறுமியிடம் தவறாக நடக்க முயன்றுள்ளார். இதனால் அதிர்ச்சியடைந்த சிறுமி கூச்சலிடவே, பிடிபட்டுவிடுவோம் என்ற பயத்தில் ஓட்டுநர் சிறுமியை ஓடும் ஆட்டோவில் இருந்து கீழே தள்ளிவிட்டுத் தப்பிச் சென்றார்.

சாலையில் விழுந்த சிறுமியை அங்கிருந்த தூய்மைப் பணியாளர்கள் மீட்டு முதலுதவி அளித்தனர். பின்னர் சிறுமியின் பெற்றோர் அளித்த புகாரின் பேரில், காவல்துறையினர் அப்பகுதியில் இருந்த சிசிடிவி கேமரா காட்சிகளை ஆய்வு செய்தனர். அதன் மூலம் குற்றவாளி மணலி பகுதியைச் சேர்ந்த 61 வயதான சண்முகம் என்பது கண்டறியப்பட்டது. தலைமறைவாக இருந்த அவரைப் பிடிக்கச் சென்றபோது, காவல்துறையினரிடம் இருந்து தப்பிக்க முயன்று பாறைகளில் விழுந்ததில் அவருக்குக் கையில் எலும்பு முறிவு ஏற்பட்டது.

தற்போது சண்முகத்தைக் கைது செய்துள்ள காவல்துறையினர், அவர் மீது போக்சோ (POCSO) சட்டத்தின் கீழ் வழக்குப் பதிவு செய்து நீதிமன்றத்தில் ஆஜர்படுத்தியுள்ளனர். பள்ளி செல்லும் சிறுமிக்கு நேர்ந்த இந்த கொடூர சம்பவம் அப்பகுதி மக்களிடையே கடும் அதிர்ச்சியையும் ஆத்திரத்தையும் ஏற்படுத்தியுள்ளது. குழந்தைகள் மற்றும் மாணவிகளின் பாதுகாப்பை உறுதி செய்ய இதுபோன்ற குற்றவாளிகளுக்குக் கடுமையான தண்டனை வழங்கப்பட வேண்டும் என்று சமூக ஆர்வலர்கள் கோரிக்கை விடுத்துள்ளனர்.