பஞ்சாப் மாநிலம் லூதியானாவின் அமன் நகர் பகுதியில் சுமார் 20 பள்ளி குழந்தைகளுடன் சென்று கொண்டிருந்த பிசிஎம் ஆர்யா பள்ளி பேருந்து ஒன்று கட்டுப்பாட்டை இழந்து மின் கம்பத்தில் மோதி பயங்கர விபத்துக்குள்ளானது. சாலையில் அஜாக்கிரதையாகக் கொட்டி வைக்கப்பட்டிருந்த மணல் குவியலின் மீது பஸ் ஏறியதால், ஓட்டுநரின் கட்டுப்பாட்டை இழந்து மின் கம்பத்தில் மோதியது சிசிடிவி காட்சிகளில் பதிவாகியுள்ளது.
மோதிய வேகத்தில் மின் கம்பம் உடைந்து, அதன் மின்சாரக் கம்பிகள் அப்படியே பள்ளி பஸ்ஸின் மீது விழுந்தன. அதிர்ஷ்டவசமாகப் பெரும் அசம்பாவிதம் தவிர்க்கப்பட்டு குழந்தைகள் பாதுகாப்பாக மீட்கப்பட்ட போதிலும், இச்சம்பவம் பெற்றோர் மத்தியில் கடும் அதிர்ச்சியையும் அச்சத்தையும் ஏற்படுத்தியுள்ளது. இச்சம்பவம் குறித்து காவல்துறையினர் வழக்குப்பதிவு செய்து விசாரணை நடத்தி வருகின்றனர்.