“ஸ்டாலின் Vs இபிஎஸ் Vs விஜய்”…. 2026-ல் தமிழ்நாட்டின் அடுத்த முதல்வர் இவரா?… சத்தா பஜார் கொடுத்த மெகா ஷாக் ரிப்போர்ட்….!

சமீபத்தில் நடைபெறவுள்ள 5 மாநில சட்டமன்றத் தேர்தல்கள் குறித்து நாடு முழுவதும் பெரும் எதிர்பார்ப்பு நிலவி வரும் நிலையில், ‘சத்தா பஜார்’ எனப்படும் யூகச் சந்தையின் தேர்தல் கணிப்புகள் வெளியாகியுள்ளன. சத்தா பஜார் என்பது அதிகாரப்பூர்வமான அமைப்பு கிடையாது என்றாலும், கள நிலவரங்களை நுணுக்கமாகக் கவனிக்கும் பந்தயக்காரர்களின் கணிப்பு என்பதால் இது பலரது கவனத்தை ஈர்த்துள்ளது. தமிழகத்தைப் பொறுத்தவரை, மொத்தமுள்ள 234 தொகுதிகளில் திமுக கூட்டணி 141 முதல் 144 இடங்களைக் கைப்பற்றி மீண்டும் ஆட்சியைத் தக்கவைக்கும் என்றும், அதிமுக 45-55 இடங்கள் வரை பெறக்கூடும் என்றும் இந்தச் சந்தை நிலவரங்கள் தெரிவிக்கின்றன.

மேற்கு வங்கத்தில் மம்தா பானர்ஜி தலைமையிலான திரிணாமுல் காங்கிரஸ் மற்றும் பாஜக இடையே மிகக் கடுமையானப் போட்டி நிலவுவதை இக்கணிப்புகள் சுட்டிக்காட்டுகின்றன. திரிணாமுல் காங்கிரஸ் 158-161 இடங்களைப் பிடித்து ஆட்சியைத் தக்கவைக்க வாய்ப்புள்ளதாகக் கூறப்பட்டாலும், பாஜக 130 இடங்கள் வரை முன்னேறி பெரும் சவாலைத் தரும் என எதிர்பார்க்கப்படுகிறது. அதேபோல் கேரளாவில், வழக்கமான ஆட்சி மாற்ற மரபுப்படி காங்கிரஸ் தலைமையிலான யுடிஎஃப் கூட்டணி 75-77 இடங்களுடன் முன்னிலை வகிக்கிறது; இருப்பினும் ஆளும் இடதுசாரி கூட்டணியுடனான வாக்கு வித்தியாசம் மிகவும் குறைவாகவே உள்ளது.

வடகிழக்கு மாநிலமான அசாமில் பாஜக தலைமையிலான தேசிய ஜனநாயகக் கூட்டணி மீண்டும் ஒரு வலுவான வெற்றியைப் பதிவு செய்யும் என சத்தா பஜார் கணிக்கிறது. அங்குள்ள 126 தொகுதிகளில் பாஜக கூட்டணி 97 முதல் 99 இடங்களைக் கைப்பற்றித் தனிப்பெரும் சக்தியாக உருவெடுக்கும் என்றும், காங்கிரஸ் கூட்டணி 23-25 இடங்களுடன் பின்தங்கும் என்றும் தகவல்கள் தெரிவிக்கின்றன. மற்ற மாநிலங்களை விட அசாமில் ஆளுங்கட்சியின் கை ஓங்கி இருப்பதை இந்தக் கணிப்புகள் உறுதிப்படுத்துகின்றன.

இருப்பினும், சத்தா பஜார் கணிப்புகள் என்பவை மக்களின் தற்போதைய மனநிலை மற்றும் யூகங்களை அடிப்படையாகக் கொண்டவை மட்டுமே. அரசியல் களத்தில் வேட்பாளர் பிரசாரம், கடைசி நேர வாக்குறுதிகள் மற்றும் மக்களின் நேரடித் தீர்ப்பு ஆகியவை எப்போது வேண்டுமானாலும் சூழலை மாற்றியமைக்கக் கூடியவை. எதுவாக இருந்தாலும், மக்களின் உண்மையான தீர்ப்பு என்ன என்பது தேர்தல் முடிவுகள் வெளியாகும் நாளன்று மட்டுமே அதிகாரப்பூர்வமாகத் தெரியவரும்.