மும்பையில் உள்ள வான்கடே மைதானத்தில் நேற்று (மார்ச் 5, 2026) நடைபெற்ற டி20 உலகக்கோப்பை அரையிறுதிப் போட்டியில், இங்கிலாந்துக்கு எதிராக இந்தியா 7 ரன்கள் வித்தியாசத்தில் த்ரில் வெற்றி பெற்றது. இப்போட்டியில் 42 பந்துகளில் 89 ரன்கள் குவித்து இந்தியாவின் வெற்றிக்கு அடித்தளமிட்ட சஞ்சு சாம்சன் ‘ஆட்டநாயகன்’ (Player of the Match) விருதுக்குத் தேர்வு செய்யப்பட்டார். இருப்பினும், இந்த விருது தனக்குக் கிடைத்திருக்கக் கூடாது என்றும், இது ஜஸ்பிரித் பும்ராவிற்கே உரியது என்றும் கூறி சஞ்சு சாம்சன் நெகிழ்ச்சியை ஏற்படுத்தியுள்ளார்.
இந்திய அணி 253 ரன்கள் என்ற இமாலய இலக்கை நிர்ணயித்த போதிலும், இங்கிலாந்து வீரர் ஜேக்கப் பெத்தேல் (105 ரன்கள்) அதிரடியால் போட்டி கடைசி ஓவர் வரை பரபரப்பாகச் சென்றது. பந்துவீச்சாளர்களுக்குச் சவாலாக இருந்த அந்த மைதானத்தில், பும்ரா மட்டும் கட்டுக்கோப்பாகப் பந்துவீசி 4 ஓவர்களில் 33 ரன்கள் மட்டுமே விட்டுக்கொடுத்து ஒரு விக்கியையும் வீழ்த்தினார். குறிப்பாக, ஆட்டத்தின் 17 மற்றும் 18-வது ஓவர்களில் அவர் வீசிய துல்லியமான பந்துவீச்சே இந்தியாவின் வெற்றியை உறுதி செய்தது.
விருது வழங்கும் விழாவில் பேசிய சஞ்சு சாம்சன், “ஜஸ்பிரித் பும்ரா ஒரு தலைமுறைக்கு ஒருமுறை மட்டுமே பிறக்கக்கூடிய அபூர்வமான பந்துவீச்சாளர். அவர் மட்டும் கடைசி ஓவர்களில் சிறப்பாகச் செயல்படவில்லை என்றால், நான் இங்கு நின்று இந்த விருதை வாங்கிக் கொண்டிருக்க மாட்டேன். எனவே இந்த விருது அவருக்கே செல்ல வேண்டும்” எனத் தனது விருதை பும்ராவிற்கு அர்ப்பணித்தார். இந்த வெற்றியின் மூலம் இந்திய அணி இறுதிப்போட்டிக்குத் தகுதி பெற்றுள்ளது; வரும் ஞாயிற்றுக்கிழமை அகமதாபாத்தில் நடைபெற உள்ள இறுதிப்போட்டியில் நியூசிலாந்தை எதிர்கொள்கிறது.