ஒரே கல்லில் 3 மாங்காய்… இனி ஒரே ஒரு கணக்கு இருந்தால் போதும்.. மத்திய அரசு ஊழியர்களுக்கு சூப்பர் குட் நியூஸ்…!

மத்திய அரசு ஊழியர்களின் நிதி நிர்வாகத்தை எளிமையாக்கும் வகையில், இந்திய அரசின் நிதிச் சேவைகள் துறை (DFS) ஒரு புதிய ‘ஒருங்கிணைந்த சம்பள கணக்குத் திட்டத்தை’ (Integrated Salary Account Scheme) அறிமுகப்படுத்தியுள்ளது. பொதுத்துறை வங்கிகளுடன் இணைந்து செயல்படுத்தப்படும் இத்திட்டத்தின் மூலம் வங்கிச் சேவைகள், காப்பீடு மற்றும் கார்டு பலன்கள் என அனைத்தும் ஒரே கணக்கின் கீழ் கொண்டுவரப்பட்டுள்ளன. இது மத்திய அரசின் குரூப் A, B மற்றும் C ஆகிய அனைத்துப் பிரிவு ஊழியர்களுக்கும் பொருந்தும் என்பதோடு, ‘விக்சித் பாரத் 2047’ இலக்கை நோக்கிய ஒரு முக்கிய நடவடிக்கையாகக் கருதப்படுகிறது.

இந்தத் திட்டத்தின் சிறப்பம்சமாக, ஊழியர்களுக்கு மிகப்பெரிய அளவிலான காப்பீட்டுப் பாதுகாப்பு வழங்கப்படுகிறது. இதில் ரூ.1.5 கோடி வரையிலான தனிநபர் விபத்துக் காப்பீடு மற்றும் ரூ.2 கோடி வரையிலான விமான விபத்துக் காப்பீடு ஆகியவை அடங்கும். மேலும், ஊழியர்களுக்குத் தேவையான வீட்டுக் கடன், வாகனக் கடன் மற்றும் கல்விக் கடன்களுக்குச் சலுகை வட்டி விகிதங்கள் வழங்கப்படுவதோடு, இதற்கான செயலாக்கக் கட்டணங்களும் (Processing Fees) தள்ளுபடி செய்யப்படுகின்றன. பூஜ்ஜிய இருப்பு (Zero Balance) கணக்கு வசதியுடன், இவை அனைத்தும் ஊழியர்களின் நிதிச் சுமையை வெகுவாகக் குறைக்க உதவும்.

வங்கி அட்டைகளைப் பொறுத்தவரை, ஊழியர்களுக்கு ரூபே (RuPay) பிளாட்டினம் அல்லது செலக்ட் போன்ற உயர்தர டெபிட் மற்றும் கிரெடிட் கார்டுகள் வழங்கப்படுகின்றன. இவற்றின் மூலம் வரம்பற்ற இலவச ஏடிஎம் பரிவர்த்தனைகள், ஆண்டுப் பராமரிப்பு கட்டண விலக்கு மற்றும் அதிகப்படியான ரிவார்டு புள்ளிகளைப் பெற முடியும். தனித்தனியாகக் காப்பீடு மற்றும் பிற நிதிச் சேவைகளைத் தேடி அலைய வேண்டிய அவசியமின்றி, ஒரே இடத்தில் அனைத்துத் தீர்வுகளையும் வழங்குவதே இந்த ஒருங்கிணைந்த சம்பள கணக்குத் திட்டத்தின் முதன்மை நோக்கமாகும்.