தமிழக பாஜகவில் நிலவும் உட்கட்சி பூசல்கள் குறித்துப் பேசிய நடிகர் எஸ்.வி.சேகர், அண்ணாமலை தேர்தல் பொறுப்புகளில் இருந்து சுயமாக விலகவில்லை என்றும், அவர் கட்சித் தலைமையால் விலக்கி வைக்கப்பட்டுள்ளார் என்று அதிரடியாகக் குறிப்பிட்டுள்ளார். அண்ணாமலை களத்தில் இருக்கும் வரை பாஜக ஒரு இடத்தில் கூட வெற்றி பெற முடியாது என்பது நயினார் நாகேந்திரனுக்கும், அதிமுக பொதுச்செயலாளர் எடப்பாடி பழனிசாமிக்கும் நன்றாகத் தெரியும் என்றும் அவர் சாடியுள்ளார். அண்ணாமலையின் செயல்பாடுகள் எதிர்க்கட்சியான திமுக-விற்குத்தான் சாதகமாக முடிந்து, அவர்களின் வெற்றியை எளிதாக்குவதாக அவர் கடும் விமர்சனத்தை முன்வைத்துள்ளார்.
மேலும், அண்ணாமலை தன்னுடன் இருப்பவர்களுக்கே குழி பறிப்பதில் வல்லவர் என்று குறிப்பிட்ட எஸ்.வி.சேகர், மற்றவர்கள் யாரும் வெற்றி பெற்றுவிடக்கூடாது என்ற எண்ணத்திலேயே அவர் செயல்படுவதாகக் குற்றம் சாட்டியுள்ளார். அண்ணாமலையின் தலைமையின் கீழ் கூட்டணி அமைப்பதில் சிக்கல்கள் நீடிப்பதையும், அது தேர்தலை எவ்வாறு பாதிக்கும் என்பதையும் அவர் சுட்டிக்காட்டியுள்ளார். அண்ணாமலை தலைமையில் பாஜக தேர்தலைச் சந்தித்தால், அது ஒரு தொகுதியில் கூட வெற்றி பெற வாய்ப்பில்லை என்பதே நிதர்சனம் என்று தனது பேட்டியில் எஸ்.வி.சேகர் உறுதிபடத் தெரிவித்துள்ளார்.