சீனாவுக்குச் செல்ல வேண்டிய ரஷ்ய எண்ணெய் கப்பல்கள் திடீரென திசைமாறி இந்தியாவை நோக்கி வருவது சர்வதேச எரிசக்தி சந்தையில் பெரும் பரபரப்பை ஏற்படுத்தியுள்ளது. ரஷ்யாவின் பால்டிக் கடலில் இருந்து ‘யூரல்ஸ்’ வகை கச்சா எண்ணெயுடன் சீனாவிலுள்ள ரிஷாவோ துறைமுகத்திற்குப் புறப்பட்ட ‘அக்வா டைட்டன்’ (Aqua Titan) என்ற கப்பல், தென் சீனக் கடலில் திடீரென தனது பாதையை மாற்றியது. மார்ச் 21-ஆம் தேதி இக்கப்பல் கர்நாடகாவின் நியூ மங்களூர் துறைமுகத்தை வந்தடையும் என்று எதிர்பார்க்கப்படுகிறது. சீனாவின் எரிசக்தி தேவையைப் பூர்த்தி செய்ய வேண்டிய கப்பல் இந்தியாவுக்குத் திரும்பியது பெய்ஜிங் தரப்பிற்கு அதிர்ச்சியை அளித்துள்ளது.
இந்த அதிரடி மாற்றத்திற்குப் பின்னால் சர்வதேச அரசியல் மற்றும் அமெரிக்காவின் நிலைப்பாடுகள் முக்கியக் காரணமாகக் கருதப்படுகின்றன. ஈரான் மற்றும் அமெரிக்கா இடையிலான மோதலால் ஹார்முஸ் ஜலசந்தியில் பதற்றம் நிலவுவதும், உலக எண்ணெய் விநியோகம் பாதிக்கப்பட்டுள்ளதும் குறிப்பிடத்தக்கது. முன்னதாக அமெரிக்காவின் அழுத்தத்தால் ரஷ்யாவிடம் இருந்து எண்ணெய் வாங்குவதை இந்தியா குறைத்திருந்தது. ஆனால், தற்போதைய சூழலில் ரஷ்யாவிடம் இருந்து கச்சா எண்ணெய் கொள்முதல் செய்ய அமெரிக்கா சில சலுகைகளை வழங்கியதைத் தொடர்ந்து, இந்திய சுத்திகரிப்பு நிறுவனங்கள் சுமார் 30 மில்லியன் பீப்பாய்கள் ரஷ்ய எண்ணெயை வாங்கியுள்ளன.
‘அக்வா டைட்டன்’ கப்பலைத் தொடர்ந்து, ‘ஸூஸூ என்’ (Suezmax Zouzou N) என்ற மற்றொரு கப்பலும் சீனாவுக்கான பயணத்தைத் தவிர்த்து இந்தியாவிற்குத் திரும்பியுள்ளது. கசாக் CPC பிளெண்ட் கச்சா எண்ணெயுடன் ரஷ்யாவின் நோவோரோஸிய்ஸ்க் பகுதியிலிருந்து புறப்பட்ட இக்கப்பல், வரும் மார்ச் 25 அன்று குஜராத்தின் சிக்கா துறைமுகத்தை வந்தடையும் எனத் தெரிகிறது. ரஷ்யாவிடமிருந்து இந்தியா மீண்டும் தள்ளுபடி விலையில் அதிகப்படியான எண்ணெயை வாங்கத் தொடங்கியிருப்பதை இந்தத் திசைமாற்றங்கள் உறுதிப்படுத்துகின்றன.
இந்தியா மட்டுமல்லாமல் ஜப்பான் மற்றும் தென் கொரியா போன்ற நாடுகளும் ரஷ்யாவிடமிருந்து மீண்டும் கச்சா எண்ணெய் கொள்முதல் செய்யத் தொடங்கியுள்ளன. இதனால் சர்வதேச சந்தையில் கச்சா எண்ணெய் விலையில் ஏற்ற இறக்கங்கள் ஏற்பட வாய்ப்புள்ளது. சீனாவுக்குக் கிடைக்க வேண்டிய கச்சா எண்ணெய் இந்தியாவின் பக்கம் திரும்புவது, ஆசிய பிராந்தியத்தில் நிலவும் எரிசக்தி அரசியலில் இந்தியாவின் கை ஓங்கியிருப்பதைக் காட்டுகிறது. ரஷ்யா-இந்தியா இடையிலான இந்த வலுவான வர்த்தக உறவு, அமெரிக்காவின் புதிய இணக்கமான போக்கினால் மேலும் வேகம் பெற்றுள்ளது.