ரயில் பயணிகளுக்கு ஹேப்பி நியூஸ்!… ஸ்டேஷனுக்கு லேட்டா போறீங்களா? கவலை விடுங்க… இந்திய ரயில்வே கொண்டு வந்த அந்த ‘மேஜிக்’ மாற்றம்…!!

இந்திய ரயில்வே ஏப்ரல் 1, 2026 முதல் பயணிகளின் வசதிக்காக போர்டிங் பாயிண்ட் (Boarding Point) மாற்றும் விதிகளில் அதிரடி மாற்றங்களைக் கொண்டு வந்துள்ளது. பழைய நடைமுறையில் ரயில் புறப்படுவதற்கு 24 மணி நேரத்திற்கு முன்பே நிலையத்தை மாற்ற வேண்டும் என்ற கட்டுப்பாடு இருந்தது. ஆனால், புதிய விதியின்படி ரயில் நிலையத்திலிருந்து புறப்படுவதற்கு சுமார் 30 நிமிடங்களுக்கு முன்பு வரை, அதாவது இறுதி சார்ட் (Final Chart) தயாராகும் வரை பயணிகள் தங்கள் ஏறும் நிலையத்தை மாற்றிக்கொள்ள முடியும். இது கடைசி நேரப் பயணத் திட்ட மாற்றங்களால் அவதிப்படும் லட்சக்கணக்கானோருக்குப் பெரும் நிம்மதியை அளித்துள்ளது.

இந்த புதிய வசதியைப் பெறுவதற்குச் சில முக்கிய நிபந்தனைகளை ரயில்வே வாரியம் வகுத்துள்ளது. குறிப்பாக, பயணிகளின் டிக்கெட் உறுதியானது (Confirmed) அல்லது ஆர்.ஏ.சி (RAC) நிலையில் இருக்க வேண்டும்; காத்திருப்போர் பட்டியலில் (Waitlisted) உள்ள டிக்கெட்டுகளுக்கு இந்தச் சலுகை பொருந்தாது. மேலும், ஒரு டிக்கெட்டிற்கு ஒரு முறை மட்டுமே போர்டிங் பாயிண்ட்டை மாற்ற அனுமதி வழங்கப்படும் என்பதால் பயணிகள் இந்த வாய்ப்பைச் சரியாகப் பயன்படுத்திக் கொள்வது அவசியமாகும்.

முக்கியமான எச்சரிக்கையாக, ஒருமுறை போர்டிங் பாயிண்ட்டை மாற்றிவிட்டால், பயணி பழைய நிலையத்திலிருந்து ரயிலில் ஏற முடியாது. புதிய போர்டிங் பாயிண்ட்டில் இருந்துதான் பயணத்தைத் தொடங்க வேண்டும். ஒருவேளை பழைய நிலையத்திலேயே ஏற முயன்றால், அந்த இருக்கை வேறு யாருக்காவது ஒதுக்கப்பட்டிருக்கலாம். அத்தகைய சூழலில் ரயில்வே நிர்வாகம் பொறுப்பேற்காது என்பதோடு, பயணி அபராதம் செலுத்த வேண்டிய நிலையும் ஏற்படலாம் என்பதை நினைவில் கொள்ள வேண்டும்.

பயணிகள் இந்தச் சேவையை ஐ.ஆர்.சி.டி.சி (IRCTC) இணையதளம், ‘ரயில்ஒன்’ (RailOne) மொபைல் செயலி அல்லது ரயில்வே டிக்கெட் கவுண்டர்கள் (PRS) மூலம் எளிதாகப் பெறலாம். ஆன்லைனில் டிக்கெட் எடுத்தவர்கள் ‘Booking History’ பகுதிக்குச் சென்று ‘Change Boarding Point’ என்ற விருப்பத்தைத் தேர்ந்தெடுப்பதன் மூலம் சில நொடிகளில் மாற்றத்தைச் செய்துகொள்ள முடியும். அதேபோல், டிக்கெட்டை ரத்து செய்வதாக இருந்தால் 8 மணி நேரத்திற்கு முன்னரே முடிவெடுப்பது பண இழப்பைத் தவிர்க்க உதவும் என அறிவுறுத்தப்படுகிறது.