தமிழகத்தில் ஆளும் கட்சியின் நிலைத்தன்மையைச் சீர்குலைக்கும் நோக்கில், தமிழக வெற்றி கழகத்தைச் சேர்ந்த சுமார் 15 சட்டமன்ற உறுப்பினர்களைப் பெருந்தொகை கொடுத்து விலைக்கு வாங்க “மேகாலயா ப்ராஜக்ட்” என்ற பெயரில் கூட்டுச்சதி நடத்தப்பட்ட அதிர்ச்சித் தகவல் தற்பொழுது அம்பலமாகியுள்ளது. அண்மையில் சட்டப்பேரவை சபாநாயகருக்கு எதிராக நம்பிக்கையில்லா தீர்மானம் கொண்டு வரத் திட்டமிடப்பட்டிருந்த சூழலில், கிருஷ்ணகிரி மாவட்டம் ஊத்தங்கரை தொகுதி தவெக சட்டமன்ற உறுப்பினர் என். இளையராஜாவின் நிலைப்பாட்டை மாற்றுவதற்காகச் சில நபர்கள் 35 கோடி ரூபாய் லஞ்சம் தர பேரம் பேசியுள்ளனர்.
இந்த அநாகரிகமான ஆஃபரை நிராகரித்த இளையராஜா உடனடியாகச் சென்னை மாநகர காவல் ஆணையரிடம் கொடுத்த புகாரின் அடிப்படையில், தீவிர விசாரணையில் இறங்கிய மத்திய குற்றப்பிரிவு போலீசார், ஏற்கனவே கைது செய்யப்பட்ட யூடியூபர் திருநாவுக்கரசு உள்ளிட்ட சிலரின் ரகசிய வாக்குமூலத்தைப் பெற்றனர்.
இதனைத் தொடர்ந்து சென்னை சூளைமேடு பகுதியில் இயங்கி வரும் “தீபம் பைனான்ஸ்” என்ற தனியார் நிதி நிறுவனத்தில் சென்னை பெருநகர போலீசார் நள்ளிரவில் அதிரடிச் சோதனையை மேற்கொண்டனர். அங்குப் பாதுகாப்பாகப் பதுக்கி வைக்கப்பட்டிருந்த கணக்கில் காட்டப்படாத சுமார் 2,82,49,000 ரூபாய் ரொக்கப் பணத்தைக் கைப்பற்றியதுடன், சட்டவிரோதப் பணப் பரிமாற்றத்திற்கு உதவியாக இருந்த இரண்டு நபர்களையும் போலீசார் அதிரடியாகக் கைது செய்துள்ளனர்.
பிடிபட்ட இந்த 2.82 கோடி ரூபாயும் தவெக சட்டமன்ற உறுப்பினருக்கு லஞ்சமாக வழங்கப்படவிருந்த முன்பணம் என்பது கைதானவர்களின் முதற்கட்ட விசாரணையில் உறுதியாகியுள்ளது. இந்த இமாலய ஊழல் சதியில் பின்னணியில் உள்ள முக்கிய அரசியல் தலைவர்கள் மற்றும் மூத்த நிர்வாகிகளின் தொடர்புகள் குறித்துப் போலீசார் தங்களது விசாரணையை முடுக்கிவிட்டுள்ளதால், அடுத்தடுத்த நாட்களில் பல முக்கியப் புள்ளிகள் கைதாகலாம் என்ற எதிர்பார்ப்போடு தமிழக அரசியலில் தற்பொழுது உச்சக்கட்ட பரபரப்பு நிலவி வருகிறது.