“சொத்தை ஆசிரமத்திற்கு தருவேன்”…. ஆத்திரத்தில் பெற்ற தந்தையையே வெட்டிக்கொன்ற என்ஜினீயர் மகன்…. அடக்கத்திற்கு முன் வெளிவந்த பகீர் உண்மை….!

காஞ்சிபுரம் மாவட்டம் வாலாஜாபாத் அருகே சொத்து தகராறு காரணமாக ஓய்வு பெற்ற மாநகரப் பேருந்து ஓட்டுநர் கத்தியால் வெட்டிக்கொலை செய்யப்பட்ட சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. சென்னை பெருங்குடியைச் சேர்ந்த சிவபாதம் (70) என்பவரே இவ்வாறு கொடூரமாகக் கொலை செய்யப்பட்டுள்ளார். இக்கொலை வழக்க தொடர்பாக, தடயங்களை மறைத்து மாரடைப்பால் இறந்ததாக நாடகமாடிய சிவபாதத்தின் மனைவி ரேணுகா (50) மற்றும் அவரது மகன் மதுசூதனன் (39) ஆகிய இருவரையும் காவல்துறையினர் கைது செய்து வேலூர் சிறையில் அடைத்துள்ளனர்.

கொலை செய்யப்பட்ட சிவபாதத்திற்கு சென்னை பெருங்குடி மற்றும் ஓஎம்ஆர் பகுதிகளில் பல வீடுகள் உள்ள நிலையில், அவற்றின் வாடகை வருவாயே குடும்பத்தின் முக்கிய வாழ்வாதாரமாக இருந்துள்ளது. கப்பல் நிறுவன வேலையை விட்டுவிட்டு வீட்டில் இருந்த பொறியியல் பட்டதாரியான மகன் மதுசூதனனுக்கும், நீரிழிவு நோயால் பாதிக்கப்பட்ட சிவபாதத்திற்கும் இடையே செலவுகளுக்குப் பணம் தருவது தொடர்பாகத் தொடர்ந்து கருத்து வேறுபாடு நிலவி வந்தது. குடும்பத் தகராறு காரணமாக சிவபாதம் வாலாஜாபாத் அருகே உள்ள மருதம் கிராமத்தில் தனியாகத் தங்கி, அன்றாட செலவுகளுக்கு உறவினர்களிடம் கடன் வாங்கி வாழ்க்கை நடத்தி வந்துள்ளார்.

சமீபத்தில் மருதம் கிராமத்தில் நடைபெற்ற உறவினர் வீட்டு விசேஷத்திற்கு வந்த மனைவியும் மகனும், சிவபாதத்திடம் சென்னைக்கு வருமாறு அழைத்துள்ளனர். ஆனால், சிவபாதம் வர மறுத்ததுடன், தனது மருத்துவச் செலவிற்காக வீடுகளின் வாடகைப் பணத்தைக் கேட்டுள்ளார். அதற்கு அவர்கள் சம்மதிக்காததால், தனக்குரிய சொத்துகளை அனாதை ஆசிரமத்திற்கு எழுதி வைத்துவிடுவேன் என சிவபாதம் மிரட்டியுள்ளார். இதனால் ஆத்திரமடைந்த மகன் மதுசூதனன், அதிகாலையில் தந்தை சிவபாதத்துடன் மீண்டும் வாக்குவாதத்தில் ஈடுபட்டு, கத்தியால் அவரது கழுத்து மற்றும் கால்களில் சரமாரியாக வெட்டியதில் சிவபாதம் சம்பவ இடத்திலேயே பரிதாபமாக உயிரிழந்தார்.

கொலைக்குப்பின், தாய் ரேணுகாவும் மகன் மதுசூதனனும் சேர்ந்து வீட்டில் இருந்த ரத்தக்கறைகளைத் துடைத்து அழித்துவிட்டு, சிவபாதம் மாரடைப்பால் இறந்துவிட்டதாக உறவினர்களிடமும் அக்கம் பக்கத்தினரிடமும் கூறி கதறி அழுது நாடகமாடியுள்ளனர். இதனை நம்பிய உறவினர்கள் சிவபாதத்தின் உடலை எரியூட்டுவதற்காக இடுகாட்டிற்கு எடுத்துச் செல்ல ஏற்பாடுகளைச் செய்தனர். அப்போது, சிவபாதத்தின் மரணத்தில் சந்தேகம் இருப்பதாக வாலாஜாபாத் காவல்துறையினருக்குக் கிடைத்த ரகசியத் தகவலின் பேரில், சம்பவ இடத்திற்கு விரைந்த காவல் துறையினர் உடலைக் கைப்பற்றிப் பிரேதப் பரிசோதனைக்காகச் செங்கல்பட்டு அரசு மருத்துவமனைக்கு அனுப்பி வைத்தனர்.

பிரேதப் பரிசோதனையில் சிவபாதத்தின் உடலில் வெட்டுக்காயங்கள் இருப்பது உறுதியானதையடுத்து, காவல்துறையினர் ரேணுகா மற்றும் மதுசூதனனிடம் தீவிர விசாரணை மேற்கொண்டனர். விசாரணையில் சொத்து தகராறில் தந்தையைக் கொலை செய்துவிட்டு மாரடைப்பு என நாடகமாடியதை இருவரும் ஒப்புக்கொண்டனர். இதையடுத்த வாலாஜாபாத் காவல்துறையினர் இருவர் மீதும் கொலை வழக்குப் பதிவு செய்து கைது செய்தனர். நீதிமன்றத்தில் ஆஜர்படுத்தப்பட்ட இருவரும் வேலூர் சிறையில் அடைக்கப்பட்டனர். பெத்த தந்தையைச் சொத்துக்காகக் மகனே வெட்டிக்கொன்ற சம்பவம் மருதம் கிராம மக்களிடையே பெரும் சோகத்தையும் பரபரப்பையும் ஏற்படுத்தியுள்ளது.