சென்னை புனித ஜார்ஜ் கோட்டையில் இயங்கி வரும் தமிழக அரசின் தலைமைச் செயலகத்தில் நிலவி வரும் தீவிர இடப் பற்றாக்குறையைக் கருத்தில் கொண்டு, அதனை வேறு ஒரு பகுதிக்கு மாற்றுவதற்கான முதற்கட்ட நடவடிக்கைகளில் அரசு இறங்கியுள்ளதாகத் தகவல்கள் வெளியாகியுள்ளன.
தற்போதைய வளாகத்தில் போதிய இடவசதி இல்லாததால் அரசுப் பணிகளை முழுத் திறனுடன் மேற்கொள்வதில் சிரமம் ஏற்பட்டுள்ள நிலையில், புதிய இடத்தை தேர்வு செய்து அதற்கான முதற்கட்ட பாதுகாப்பு ஆய்வுகளையும் கோட்டை வட்டார அதிகாரிகள் தீவிரமாக மேற்கொண்டு வருகின்றனர். முன்னதாக, முதலமைச்சரின் அலுவலகப் பிரிவு மட்டும் தற்காலிகமாக நாமக்கல் மாளிகைக்கு மாற்றப்பட உள்ளதாகத் தகவல்கள் கசிந்த நிலையில், தற்போது ஒட்டுமொத்த தலைமைச் செயலகத்தையே மாற்றும் தொலைநோக்குச் செயல்பாடுகள் முடுக்கிவிடப்பட்டிருப்பது அரசியல் மற்றும் நிர்வாக வட்டாரங்களில் பெருத்த கவனத்தைப் பெற்றுள்ளது.