தமிழ்நாட்டில் டாஸ்மாக் சில்லறை விற்பனை கடைகளில் நாள்தோறும் பல கோடி ரூபாய் அளவிற்கு மதுபான விற்பனை நடைபெற்று வருகிறது. அரசின் பல்வேறு மக்கள் நலத்திட்டங்களைச் செயல்படுத்துவதற்குத் தேவையான நிதி ஆதாரத்தை அள்ளிக்கொடுக்கும் ஒரு ‘அட்சய பாத்திரமாக’ டாஸ்மாக் நிறுவனம் திகழ்கிறது. இருப்பினும், டாஸ்மாக் கடைகளில் விற்பனை செய்யப்படும் மதுபாட்டில்களுக்கு, நிர்ணயிக்கப்பட்ட விலையை விடக் கூடுதலாக ₹10 முதல் ₹20 வரை வசூலிக்கப்படுவதாக மதுப்பிரியர்கள் மற்றும் பொதுமக்கள் தரப்பில் தொடர்ந்து புகார்கள் எழுந்த வண்ணம் உள்ளன. இதனைத் தடுக்க அரசு பல்வேறு கட்ட நடவடிக்கைகளை எடுத்து வந்தாலும், கூடுதல் கட்டண வசூல் தொடர்கதையாகவே இருந்து வருகிறது.
இப்பிரச்சினைக்கு முற்றுப்புள்ளி வைக்கும் வகையிலும், நுகர்வோரின் புகார்களுக்கு உடனுக்குடன் தீர்வு காணும் வகையிலும் தமிழக அரசு ஒரு புதிய அறிவிப்பை வெளியிட்டுள்ளது. இது குறித்து மதுவிலக்கு மற்றும் ஆயத்தீர்வை துறை அமைச்சர் விக்னேஷ் வெளியிட்டுள்ள அறிவிப்பில், டாஸ்மாக் வாடிக்கையாளர்கள் மற்றும் பொதுமக்கள் தங்கள் புகார்களை எளிதாகப் பதிவு செய்ய ஏதுவாகக் கட்டணமில்லா வாடிக்கையாளர் சேவை மையம் மற்றும் அதிகாரப்பூர்வ சமூக ஊடகத் தளங்கள் 31.08.2026 முதல் செயல்பாட்டிற்கு வந்துள்ளதாகத் தெரிவிக்கப்பட்டுள்ளது.
பொதுமக்கள் மற்றும் நுகர்வோர்கள் கூடுதல் கட்டண வசூல் அல்லது சேவை தொடர்பான குறைகளைத் தெரிவிக்க 1800-889-2015 என்ற கட்டணமில்லா தொலைபேசி எண்ணையும், +91-7397720230 என்ற அதிகாரப்பூர்வ வாட்ஸ்அப் (WhatsApp) எண்ணையும் பயன்படுத்தலாம். இந்த வாடிக்கையாளர் சேவை மையமானது வாரம் முழுவதும் 24 மணி நேரமும் (24/7) தங்குதடையின்றிச் செயல்படும். மேலும், சமூக ஊடகங்கள் வாயிலாகப் புகார் அளிக்க விரும்புவோர் TASMAC Official (Facebook & YouTube), @TasmacOfficial (X – Twitter) மற்றும் @tasmac_official (Instagram) ஆகிய அதிகாரப்பூர்வ பக்கங்கள் மூலமாகவும் தொடர்பு கொள்ளலாம்.
இத்தளங்கள் மூலம் பெறப்படும் புகார்கள் அனைத்தும் உடனடியாகச் சம்பந்தப்பட்ட துறை அதிகாரிகளின் கவனத்திற்கு எடுத்துச் செல்லப்பட்டு, உரிய ஆய்வுக்குப் பின் விரைவான நடவடிக்கை எடுக்கப்படும் என்று அமைச்சர் உறுதி அளித்துள்ளார். அதிகக் கட்டணம் வசூலிக்கும் ஊழியர்கள் மீது கடும் நடவடிக்கை பாயும் என எச்சரிக்கப்பட்டுள்ள நிலையில், அரசின் இந்த முயற்சி டாஸ்மாக் கடைகளில் நடைபெறும் முறைகேடுகளைக் கட்டுப்படுத்தி, நுகர்வோரின் உரிமைகளைப் பாதுகாக்கும் என எதிர்பார்க்கப்படுகிறது.