“ரைடு முடிஞ்சும் விடாத ஓட்டுநர்… நள்ளிரவில் வந்த மெசேஜ்… ஸ்கிரீன்ஷாட்டை தட்டிவிட்ட பெண்”.. ராபிடோ ஓட்டுநரின் அத்துமீறல்… சமூக வலைதளங்களில் வைரலாகும் பகீர் உரையாடல்…!!!

இன்ஸ்டாகிராம் பயனர் அனுஷ்கா என்பவர், தனது ராபிடோ பயணத்திற்குப் பிறகு அந்த ஓட்டுநர் அத்துமீறி வாட்ஸ்அப்பில் தனக்குச் செய்தி அனுப்பியதாகப் புகாரளித்துள்ளார். பயணம் முடிந்த பிறகும் தனது தனிப்பட்ட கைபேசி எண்ணைப் பயன்படுத்தி ஓட்டுநர் உரையாட முயன்றது அதிர்ச்சியளிப்பதாகக் கூறிய அவர், அந்த உரையாடலின் ஸ்கிரீன்ஷாட்டையும் சமூக வலைதளத்தில் பகிர்ந்துள்ளார். இந்தப் பதிவு இணையத்தில் வைரலாகி, பயணிகளின் பாதுகாப்பு மற்றும் தரவுத் தனியுரிமை குறித்த பெரும் விவாதத்தைக் கிளப்பியுள்ளது.

இந்தச் புகாருக்கு உடனடியாகப் பதிலளித்துள்ள ராபிடோ நிறுவனம், ஓட்டுநரின் இத்தகைய செயல் தங்களது சேவை விதிமுறைகளுக்கு எதிரானது என்று கூறி மன்னிப்புக் கோரியுள்ளது. மேலும், இது குறித்து முறையான விசாரணை நடத்தி கடுமையான நடவடிக்கை எடுப்பதாக உறுதியளித்துள்ளது. பாதிக்கப்பட்ட பயனர் தனது பயண விவரங்களை நேரடியாகப் பகிருமாறும், இந்தப் பிரச்சனைக்கு முன்னுரிமை அளிக்கப்படும் என்றும் அந்நிறுவனம் தெரிவித்துள்ளது.

இந்தச் சம்பவம், செயலிகள் மூலம் வாகனங்களை முன்பதிவு செய்யும் பயணிகளின் தரவுப் பாதுகாப்பு (Data Privacy) எவ்வளவு முக்கியம் என்பதை மீண்டும் ஒருமுறை உணர்த்தியுள்ளது. பயணம் முடிந்த பிறகு ஓட்டுநர்களால் பயணிகளின் எண்கள் அணுகப்படுவதைத் தடுக்க, ‘நம்பர் மாஸ்கிங்’ (Number Masking) போன்ற தொழில்நுட்பங்களை நிறுவனங்கள் இன்னும் வலுப்படுத்த வேண்டும் எனப் பொதுமக்கள் வலியுறுத்தி வருகின்றனர். குறிப்பாகப் பெண்களின் பாதுகாப்பு குறித்த அச்சத்தை இத்தகைய நிகழ்வுகள் அதிகரித்துள்ளன.