பெங்களூரைச் சேர்ந்த ஒரு பெண் சமீபத்தில் ‘ராபிடோ’ இருசக்கர வாகனத்தை முன்பதிவு செய்தபோது, யாரும் எதிர்பாராத ஒரு விசித்திரமான மற்றும் நகைச்சுவையான சம்பவம் அரங்கேறியுள்ளது. அன்றாட வாழ்வில் பலரும் பயணச் செயலிகளைப் பயன்படுத்தினாலும், இந்தப் பெண்ணுக்கு நடந்த சம்பவம் இணையவாசிகளைச் சிரிக்க வைத்து தற்போது பேசுபொருளாக மாறியுள்ளது.
அந்தப் பெண் தனது பயணத்திற்காக வந்த ராபிடோ ஓட்டுநரை சந்தித்தவுடன், பயணத்தை தொடங்குவதற்கான ரகசிய எண்ணை அவரிடம் தெரிவித்துள்ளார். பின்னர், அவர் கொடுத்த ஹெல்மெட்டை வாங்கி தலையில் அணிந்துகொண்டு வண்டியில் ஏறத் தயாரானார். ஆனால், அந்தப் பெண் வண்டியில் ஏறுவதற்கு முன்பே, ஓட்டுநர் வண்டியை எடுத்துக் கொண்டு வேகமாகச் சென்றுவிட்டார். அதைவிட ஆச்சரியம் என்னவென்றால், சுமார் 10 நிமிடங்களுக்கும் மேலாகத் தனது வண்டியின் பின்னால் பயணி யாரும் அமரவில்லை என்பதைக்கூட உணராமல் அந்த ஓட்டுநர் தனியாகவே வண்டியை ஓட்டிச் சென்றுள்ளார்.
இந்த வேடிக்கையான அனுபவத்தைக் குறித்து அந்தப் பெண் தனது ‘எக்ஸ்’ வலைதளப் பக்கத்தில், ஹெல்மெட் அணிந்திருக்கும் தனது புகைப்படத்தோடு பகிர்ந்து கொண்டார். பின்னால் ஆள் இல்லாமல் தனியாக வந்திருக்கிறோம் எனத் தெரிந்ததும் அந்த ஓட்டுநரின் ரியாக்ஷன் எப்படி இருந்திருக்கும் எனச் சற்று கற்பனை செய்து பாருங்கள் எனவும் அவர் நகைச்சுவையாகப் பதிவிட்டிருந்தார். இந்த சம்பவத்தைப் பார்த்த நெட்டிசன்கள், “ஒருவேளை உங்களை விட அவருக்கு அதிக அவசரம் போல” என்றும், “திரும்பி வர வெட்கப்பட்டுக்கொண்டு எங்காவது மலைப் பகுதிக்குச் சென்று செட்டிலாகி இருப்பார்” என்றும் கிண்டலடித்து விதவிதமான கருத்துகளைப் பதிவிட்டு வருகின்றனர்.