தமிழக அரசியலில் 2026 சட்டமன்றத் தேர்தல் களம் இப்போதே சூடுபிடிக்கத் தொடங்கியுள்ள நிலையில், திமுக கூட்டணியில் தொகுதிப் பங்கீடு குறித்த முக்கியத் தகவலை தமிழக வாழ்வுரிமை கட்சித் தலைவர் வேல்முருகன் வெளியிட்டுள்ளார். நெல்லையில் செய்தியாளர்களிடம் பேசிய அவர், கடந்த 2021 தேர்தலை விட வரும் 2026 தேர்தலில் திமுக அதிக இடங்களில் நேரடியாகப் போட்டியிடத் திட்டமிட்டுள்ளதாகத் தெரிவித்தார். சமீபத்தில் பாமக தலைவர் ஜி.கே. மணி அனைத்துத் தரப்பினருடனும் பேச்சுவார்த்தை நடத்தி வருவதாகக் கூறி ஒரு எதிர்பார்ப்பை ஏற்படுத்தியிருந்த நிலையில், திமுக கூட்டணிக்குள் ராமதாஸ் தலைமையிலான பாமக வருவதற்கான வாய்ப்புகள் துளியும் இல்லை என வேல்முருகன் திட்டவட்டமாக மறுத்துள்ளார்.
திமுக தலைமையிலான கூட்டணியில் அங்கம் வகிக்கும் ஒரு முக்கியத் தலைவர் இவ்வாறு பேசியிருப்பது அரசியல் வட்டாரத்தில் பெரும் விவாதத்தைக் கிளப்பியுள்ளது. குறிப்பாக, சிறிய கட்சிகளுக்கு ஒதுக்கப்படும் இடங்களின் எண்ணிக்கை குறையக்கூடும் என்பதையும், திமுக தனது தனிப்பெரும்பான்மையை வலுப்படுத்திக் கொள்ள விரும்புவதையும் இந்தத் தகவல் சூசகமாக உணர்த்துகிறது. பாமகவின் நகர்வுகள் குறித்துப் பல்வேறு யூகங்கள் நிலவி வரும் சூழலில், வேல்முருகனின் இந்த “அப்டேட்” கூட்டணிக் கணக்குகளில் புதிய திருப்பத்தை ஏற்படுத்தியுள்ளது.