“பாமகவில் திடீர் டிவிஸ்ட்”…. மாம்பழம் சின்ன வழக்கை வாபஸ் பெற்ற ராமதாஸ்…. தமிழக அரசியலில் அதிரடி திருப்பம்….!

பாமக நிறுவனர் ராமதாஸ் மற்றும் அக்கட்சியின் தலைவர் அன்புமணி ராமதாஸ் ஆகியோருக்கு இடையே ஏற்பட்டுள்ள உட்கட்சிப் பூசல் காரணமாக, கட்சியின் பெயர், கொடி மற்றும் மாம்பழம் சின்னத்தைப் பயன்படுத்துவதில் பெரும் சர்ச்சை நீடித்து வருகிறது. வரும் தமிழக சட்டமன்றத் தேர்தலில் மாம்பழச் சின்னத்தை அன்புமணி தரப்பு பயன்படுத்துவதற்குத் தடை விதிக்கக் கோரி ராமதாஸ் சென்னை உயர் நீதிமன்றத்தில் மனுத் தாக்கல் செய்திருந்தார். இந்த விவகாரம் அரசியல் வட்டாரத்தில் பெரும் பரபரப்பை ஏற்படுத்தியது.

இந்த நிலையில், இந்த வழக்கில் ஒரு முக்கிய திருப்பமாக, தான் தொடர்ந்த மனுவைத் திரும்பப் பெற்றுக்கொள்வதாக ராமதாஸ் தரப்பில் சென்னை உயர் நீதிமன்றத்தில் தெரிவிக்கப்பட்டது. ஏற்கனவே இந்த விவகாரத்தை ஒரு சிவில் பிரச்சனையாகக் கருதி, உரிய உரிமையியல் நீதிமன்றத்தின் (Civil Court) மூலம் தீர்வு காணுமாறு உயர் நீதிமன்றம் அறிவுறுத்தியிருந்தது. இதனைத் தொடர்ந்து, ராமதாஸ் தரப்பு சென்னை உரிமையியல் நீதிமன்றத்தில் புதிய மனுவைத் தாக்கல் செய்தது.

உரிமையியல் நீதிமன்றத்தில் தற்போது இந்த வழக்கு நிலுவையில் இருப்பதால், உயர் நீதிமன்றத்தில் தாக்கல் செய்யப்பட்ட முந்தைய மனுவைத் தொடர வேண்டிய அவசியம் இல்லை என ராமதாஸ் தரப்பு வழக்கறிஞர்கள் வாதிட்டனர். அவர்களின் கோரிக்கையை ஏற்றுக் கொண்ட உயர் நீதிமன்ற நீதிபதி, ராமதாஸ் தாமாக முன்வந்து வழக்கை வாபஸ் பெற்றதையடுத்து, அந்த மனுவைத் தள்ளுபடி செய்து உத்தரவிட்டார். இதன் மூலம் உயர் நீதிமன்றத்தில் இருந்த சின்னம் தொடர்பான சட்டப் போராட்டம் தற்காலிகமாக முடிவுக்கு வந்துள்ளது.

இருப்பினும், சென்னை உரிமையியல் நீதிமன்றத்தில் இந்த வழக்கு மார்ச் 9-ஆம் தேதி மீண்டும் விசாரணைக்கு வரவுள்ளது. அங்கு அன்புமணி ராமதாஸ் மற்றும் தேர்தல் ஆணையம் தங்களது விளக்கத்தை அளிக்க நீதிபதி உத்தரவிட்டுள்ளார். கட்சியின் தலைமைப் பொறுப்பு மற்றும் சின்னம் யாருக்கு என்பதில் ராமதாஸ் மற்றும் அன்புமணி ஆகிய இரு தரப்புக்கும் இடையே நிலவும் இந்த மோதல், வரும் தேர்தல் களத்தில் பாமகவின் செயல்பாடுகளைப் பாதிக்குமா என்ற கேள்வி அக்கட்சியினரிடையே எழுந்துள்ளது.