2026-ஆம் ஆண்டு தமிழக சட்டமன்றத் தேர்தல் களம் சூடுபிடிக்கத் தொடங்கியுள்ள நிலையில், வடதமிழகத்தில் செல்வாக்கு மிக்க பாட்டாளி மக்கள் கட்சியில் ஏற்பட்டுள்ள பிளவு அரசியல் வட்டாரத்தில் பெரும் பரபரப்பை ஏற்படுத்தியுள்ளது. கட்சியின் நிறுவனர் மருத்துவர் ராமதாஸ் மற்றும் தலைவர் அன்புமணி ராமதாஸ் ஆகியோரிடையே ஏற்பட்டுள்ள கருத்து வேறுபாட்டால் கட்சி தற்போது இரண்டு பிரிவுகளாகச் செயல்பட்டு வருகிறது. இதில் அன்புமணி ராமதாஸ் அதிமுக தலைமையிலான கூட்டணியில் இணைய முடிவெடுத்த நிலையில், அதற்குப் போட்டியாக ராமதாஸ் அவர்கள் திமுக கூட்டணியில் இணைய மேற்கொண்ட முயற்சிகள் தோல்வியில் முடிந்துள்ளதாகத் தகவல்கள் தெரிவிக்கின்றன.
திமுக கூட்டணியில் இணைய ராமதாஸ் தரப்பு ஆர்வம் காட்டிய போதிலும், அங்கு அங்கம் வகிக்கும் விடுதலைச் சிறுத்தைகள் கட்சியின் தலைவர் திருமாவளவனின் கடும் எதிர்ப்பு காரணமாக அவருக்கு முட்டுக்கட்டை விழுந்துள்ளது. ராமதாஸின் பேரன்கள் நேரடியாகப் பேச்சுவார்த்தை நடத்தியும் சுமுகமான முடிவு எட்டப்படவில்லை. மேலும், ராமதாஸ் தரப்பு எதிர்பார்த்த எண்ணிக்கையிலான தொகுதிகளை ஒதுக்க திமுக முன்வராததும், வெறும் 3 இடங்களை மட்டுமே வழங்க முன்வந்ததும் ராமதாஸை கடும் அதிருப்திக்கு உள்ளாக்கியுள்ளது. இதன் விளைவாக, தற்போது அவர் திமுக அரசுக்கு எதிராகத் தனது விமர்சனங்களை முன்வைக்கத் தொடங்கியுள்ளார்.
இக்கட்டான இந்தச் சூழலில், ராமதாஸ் எந்தக் கூட்டணியிலும் இணையாமல் தனித்துப் போட்டியிட முடிவெடுத்துள்ளதாகத் தகவல்கள் வெளியாகியுள்ளன. அவர் மற்ற கூட்டணிகளுக்குச் செல்லாமல் தனித்துப் போட்டியிடுவதன் மூலம் வாக்குகளைப் பிரிப்பதே திமுகவின் ரகசியத் திட்டமாக இருக்கலாம் என்று அரசியல் நோக்கர்கள் கருதுகின்றனர். திமுக தரப்பிலிருந்து கொடுக்கப்பட்ட இந்த ரகசிய ‘ஆஃபர்’ காரணமாகவே ராமதாஸ் இத்தகைய அதிரடி முடிவை நோக்கி நகர்வதாகவும், இது வரும் தேர்தலில் அதிமுக கூட்டணிக்குக் கிடைக்க வேண்டிய வாக்குகளைப் பாதிக்கும் என்றும் கூறப்படுகிறது.
இருப்பினும், ராமதாஸின் இந்தத் திடீர் முடிவு அவரது தரப்பு நிர்வாகிகளிடையே பெரும் கலக்கத்தை ஏற்படுத்தியுள்ளது. தனித்துப் போட்டியிட்டால் குறைந்தபட்சம் 50 தொகுதிகளில் வேட்பாளர்களை நிறுத்த வேண்டியிருக்கும் என்றும், ஆனால் தேர்தல் செலவுகளைச் செய்யத் தன்னிடம் போதிய நிதி வசதி இல்லை என்றும் ராமதாஸ் நிர்வாகிகளிடம் வெளிப்படையாகக் கூறியதாகத் தெரிகிறது. தேர்தல் செலவுகளை வேட்பாளர்களே ஏற்க வேண்டிய கட்டாயம் உருவானால், அது கட்சிக்கு மிகப்பெரிய பின்னடைவைத் தரும் என்பதால், ராமதாஸின் ஆதரவாளர்கள் தங்களின் அரசியல் எதிர்காலம் குறித்து பெரும் குழப்பத்தில் ஆழ்ந்துள்ளனர்.