பாமக நிறுவனர் ராமதாஸ் மற்றும் அவருடைய மகனும் பாமக தலைவருமான அன்புமணி இடையே மோதல் போக்கு நாளுக்கு நாள் அதிகரித்து வருகிறது. அன்புமணியை தலைவர் பொறுப்பிலிருந்து நீக்குவதாக அறிவித்த ராமதாஸ், அவர் இனி செயல் தலைவர் மட்டுமே என்றும் கட்சியின் நிறுவனராகவும் தலைவராகவும் நானே செயல்படுவேன் என்றும் அறிவித்துள்ளார். அதே சமயம் ராமதாஸ் மூலம் கட்சியிலிருந்து நீக்கப்பட்ட நிர்வாகிகளை அன்புமணி கட்சியில் சேர்ப்பதாக அறிவித்தார்.
இதனைத் தொடர்ந்து சமீபத்தில் அன்புமணியை ஒட்டுமொத்த அடிப்படை உறுப்பினர் பதவிகளில் இருந்தும் நீக்குவதாக ராமதாஸ் அறிவித்திருந்தார். இப்படி இருவரும் மாறி மாறி அறிவிப்பு வெளியிட்டு வருவதால் பாமகவினர் மத்தியில் குழப்பம் நிலவி வருகிறது. அன்புமணி மற்றும் ராமதாஸ் இடையில் ஏற்பட்ட பிரச்சனையால் பாமக இரண்டாக பிரிந்து கிடக்கிறது. இதனால்தான் பாமக இதுவரை கூட்டணி அமைக்கவில்லை.
இந்நிலையில் தந்தை மற்றும் மகன் பிரச்சனை கடந்த பத்தாம் தேதியே முடிந்து விட்டதாக சற்று முன் ராமதாஸ் அறிவித்துள்ளார். தீயவை கீழே போகும், நல்லவை மேலே போகும் என்று கூறிய அவர், யாருடன் கூட்டணி என்பது குறித்து அறிவிப்பு விரைவில் வெளியாகும் என்றும் தெரிவித்துள்ளார்.