நமக்கு இந்த கலை, கதாபாத்திரமாவே மாறிடறது எல்லாம் இல்ல.. இதுக்காகதான் நடிக்கிறேன் – சக நடிகரிடம் ஓப்பனாகப் பேசிய சூப்பர் ஸ்டார்!

தமிழ் சினிமாவில் 40 ஆண்டுகளுக்கும் மேலாக சூப்பர் ஸ்டாராக வலம் வந்து கொண்டிருக்கிறார் ரஜினிகாந்த். அவர் படங்கள் இன்றளவும் வசூல் சாதனை படைத்து வருகின்றன. சமீபத்தில் அவர் நடித்த ஜெயிலர் திரைப்படம் 600 கோடி ரூபாய்க்கு மேல் வசூலித்து சாதனை படைத்தது. 1975 ஆம் ஆண்டு வெளியான அபூர்வ ராகங்கள் திரைப்படத்தின் மூலமாக தமிழ் சினிமாவில் அறிமுகமானார் ரஜினிகாந்த். அந்த படத்தில் ஒரு மிகச்சிறிய வேடமே அவருக்குக் கொடுக்கப்பட்டு இருந்தது.

அதன் பிறகு மூன்று முடிச்சு உள்ளிட்ட திரைப்படங்களில் வில்லனாக நடித்து தனக்கென ஒரு ஸ்டைலை உருவாக்கினார். அதன் பின்னர் அவர் தொட்டதெல்லாம் வெற்றிதான். அதிலிருந்து இப்போது வரை தமிழ் சினிமாவின் மாஸ் மகாராஜாவாக இருக்கிறார். தற்போது தன்னுடைய 73 வயதிலும் தன்னுடைய அடுத்த தலைமுறை நடிகர்களான விஜய், அஜித் ஆகியோருக்கு போட்டியாக களத்தில் நிற்கிறார்.

இந்நிலையில் சமீபத்தில் அவரின் அடுத்த படமான ‘ஜெயிலர் 2’ படத்தின் அறிமுக முன்னோட்ட வீடியோ வெளியானது. அதில் சில ஷாட்களில் நடித்திருப்பது ரஜினியே இல்லை என்றும் டூப் என்றும் விமர்சனங்கள் எழுந்தன. இதையடுத்து அந்த கிள்ம்ப்ஸ் வீடியோவின் மேக்கிங் வீடியோவை வெளியிட்ட தயாரிப்பு நிறுவனம், அதில் ரஜினிகாந்த் நடித்துள்ளதை உறுதி செய்தது.

ரஜினிகாந்த் ஆரம்பகாலத்தில் முள்ளும் மலரும், ஜானி, புவனா ஒரு கேள்விக்குறி, ஜானி, ஆறிலிருந்து அறுபது வரை போன்ற நல்லக் கதையம்சம் உள்ள படங்களில், அந்த கதைக்குத் தேவையான கதாபாத்திரத்தில் நடித்தார். ஆனால் ஒரு கட்டத்தில் அவர் சூப்பர் ஸ்டார் ஆன பின்னர் அவர் நடித்தது எல்லாம் கதாநாயக அம்சமுள்ள மாஸ் ஹீரோ வேடம்தான். அதனால் ரஜினி என்ற நல்ல நடிகரை நாம் இழந்துவிட்டதாக இப்போதும் விமர்சனங்கள் உள்ளன.

இந்நிலையில் சில ஆண்டுகளுக்கு முன்னர் ரஜினிகாந்த், மறைந்த நடிகர் விவேக்குக்கு அளித்த ஒரு நேர்காணலில் தான் நடிக்கும் வேடங்கள் குறித்துப் பேசியுள்ளார். அதில் ”எனக்கு இந்த கலைக்காக நடிக்கிறேன், என்னை மறந்து கதாபாத்திரமாவே மாறிடுறேன் என்பதெல்லாம் இல்லை. நான் காசுக்காக நடிக்கிறேன், ரசிகர்களுக்காக நடிக்கிறேன் அவ்வளவுதான்” என ஓப்பனாகப் பேசியுள்ளார்.