தமிழக சட்டமன்றத் தேர்தலில் தமிழக வெற்றிக் கழகம் (தவெக) 108 இடங்களில் அபார வெற்றி பெற்று, அக்கட்சியின் தலைவர் விஜய் தமிழகத்தின் புதிய முதலமைச்சராகப் பதவியேற்றுள்ளார். இத்தேர்தலில் திமுக மற்றும் அதிமுக ஆகிய இரு பெரும் கட்சிகளும் கடுமையான தோல்வியைச் சந்தித்தன. குறிப்பாக, கொளத்தூர் தொகுதியில் திமுக தலைவர் மு.க.ஸ்டாலின் தோல்வியடைந்தார். தேர்தல் முடிவுகளுக்குப் பிறகு, ஸ்டாலினை நடிகர் ரஜினிகாந்த் நேரில் சந்தித்துப் பேசினார். இந்தச் சந்திப்பைத் தொடர்ந்து, விஜய் முதல்வராவதைத் தடுப்பதற்காக திமுக மற்றும் அதிமுக இணைந்து கூட்டணி அமைக்கவும், எடப்பாடி பழனிசாமியை முதல்வராக்கவும் ரஜினிகாந்த் தூதுவராகச் செயல்பட்டார் என்று சமூக வலைத்தளங்களில் வதந்திகள் தீயாய்ப் பரவின.
இந்தக் கடுமையான விமர்சனங்களுக்கும் வதந்திகளுக்கும் முற்றுப்புள்ளி வைக்கும் வகையில், சென்னை போயஸ் கார்டனில் நடிகர் ரஜினிகாந்த் இன்று செய்தியாளர்களைச் சந்தித்து அதிரடி விளக்கம் அளித்தார். “இப்படிப்பட்ட தரங்கெட்ட அரசியல் செய்யும் ஆள் இந்த ரஜினி கிடையாது; நான் அரசியலிலும் இல்லை, எனக்கு ஏன் பொறாமை வரப்போகிறது?” என்று அவர் திட்டவட்டமாக மறுத்தார். மேலும், தமக்கும் மு.க.ஸ்டாலினுக்கும் இடையேயான நட்பு கொள்கை மற்றும் அரசியலுக்கு அப்பாற்பட்டு 40 ஆண்டுகளுக்கும் மேலானது என்றும், தேர்தலில் பெற்ற தோல்வியால் கஷ்டப்படும் காலத்தில் ஒரு நண்பனாக அவருக்கு ஆறுதல் கூறவே நேரில் சென்றதாகவும் ரஜினி நெகிழ்ச்சியுடன் குறிப்பிட்டார்.
புதிய முதல்வர் விஜய் குறித்துப் பேசிய ரஜினிகாந்த், தமக்கும் விஜய்க்கும் இடையே 28 ஆண்டுகள் வயது வித்தியாசம் உள்ளதைச் சுட்டிக்காட்டி, அவர் வெற்றி பெற்ற உடனே தமது வாழ்த்துகளைத் தெரிவித்துவிட்டதாகக் கூறினார். “விஜய் தனியாகப் போட்டியிட்டுப் மாபெரும் வெற்றி பெற்றுள்ளார். எம்ஜிஆர், என்டிஆர் ஆகியோரை விடவும் அதிக அளவில் அவர் பெற்றுள்ள இந்த வெற்றி எனக்கு ஆச்சரியம் கலந்த சந்தோஷத்தைத் தருகிறது” என்று அவர் பாராட்டினார். தொடர்ந்து பேசிய அவர், ஒருவேளை கமல்ஹாசனே முதலமைச்சராகி இருந்தாலும் கூட, அவருடன் நடித்துக் கொண்டிருக்கும் படம் நின்றுவிடுமோ என்று கவலைப்பட்டிருப்பேனே தவிர, தமக்கு ஒருபோதும் பொறாமை வந்திருக்காது என்றும் நகைச்சுவையுடன் தெளிவுபடுத்தினார்.
ரஜினிகாந்தின் இந்த விளக்கத்தைத் தொடர்ந்து, திமுக செய்தித் தொடர்பாளர் டி.கே.எஸ். இளங்கோவன் செய்தியாளர்களைச் சந்தித்து தமது கருத்துகளைப் பகிர்ந்துகொண்டார். ரஜினிகாந்த் உண்மையான நிலவரத்தை வெளிப்படையாகப் பேசியுள்ளார் என்று குறிப்பிட்ட அவர், தனிப்பட்ட நட்பின் காரணமாகவே அவர் ஸ்டாலினைச் சந்தித்தார் என்பதை உறுதிப்படுத்தினார். மேலும், திமுக – அதிமுக கூட்டணி தொடர்பான தேவையற்ற விவாதங்களில் நடிகர் ரஜினிகாந்தின் பெயர் வீணாக இழுக்கப்பட்டுள்ளது என்றும், ரஜினியின் தற்போதைய நேரடிப் பதில் இந்தத் தவறான வதந்திகளுக்கு முழுமையாக முற்றுப்புள்ளி வைக்கும் என்றும் டி.கே.எஸ். இளங்கோவன் தெரிவித்துள்ளார்.