கொட்டும் மழையில் போயஸ் கார்டன் வாசலில் திரண்ட கூட்டம்…. கதவைத் திறந்து ரஜினி செய்த காரியம்….!

சென்னை போயஸ் கார்டனில் உள்ள தனது இல்லத்திற்கு வெளியே திரண்டிருந்த ரசிகர்களை நேரில் சந்தித்து, நடிகர் ரஜினிகாந்த் தனது தீபாவளி நல்வாழ்த்துகளைத் தெரிவித்தார். தீபாவளி பண்டிகையையொட்டி இன்று காலை முதலே அவரது வீட்டின் முன்பாக ஏராளமான ரசிகர்கள் குவியத் தொடங்கினர். பண்டிகை காலங்களில் தன்னைத் தேடி வரும் ரசிகர்களை நேரில் சந்தித்து வாழ்த்து கூறுவதை வழக்கமாகக் கொண்டுள்ள ரஜினி, இந்த ஆண்டும் தவறாமல் ரசிகர்களைச் சந்தித்து உற்சாகப்படுத்தினார்.

வீட்டிலிருந்து வெளியே வந்த நடிகர் ரஜினிகாந்த், வாசலில் காத்திருந்த ரசிகர்களைப் பார்த்துக் கையெடுத்துக் கும்பிட்டும், கையசைத்தும் தனது வாழ்த்துகளைப் பகிர்ந்து கொண்டார். தலைவர் ரஜினியைக் கண்டதும் ரசிகர்கள் பெரும் ஆரவாரத்துடன் தங்களின் மகிழ்ச்சியை வெளிப்படுத்தினர். கொட்டும் மழையையும் பொருட்படுத்தாமல், ரஜினியின் ஒரு பார்வைக்காகவும் வாழ்த்துக்காகவும் காலை முதலே ரசிகர்கள் வீட்டின் முன் காத்திருந்தது குறிப்பிடத்தக்கது.

தொடர்ந்து மழை பெய்து கொண்டிருந்ததால், ரசிகர்கள் மழையில் நனைந்து சிரமப்பட வேண்டாம் என்பதைக் கருத்தில் கொண்ட ரஜினிகாந்த், வாழ்த்துகளைப் பெற்றுக் கொண்டு பாதுகாப்பாக வீட்டிற்குப் புறப்படுமாறு ரசிகர்களுக்குச் சைகை மூலம் அன்புடன் கேட்டுக்கொண்டார். ரஜினியின் இந்த அன்பான அணுகுமுறை அங்கு கூடியிருந்த ரசிகர்களை மேலும் நெகிழ்ச்சியடையச் செய்தது.

நாடு முழுவதும் தீபாவளி பண்டிகை விமரிசையாகக் கொண்டாடப்பட்டு வரும் நிலையில், திரை உலகின் சூப்பர் ஸ்டாரான ரஜினிகாந்தின் இந்தச் சந்திப்பு அவரது ரசிகர்களுக்கு இரட்டிப்பு மகிழ்ச்சியையும், தீபாவளிக் கொண்டாட்டத்திற்குத் தனி உற்சாகத்தையும் அளித்துள்ளது.