தலையில் மாட்டிய பால் கேன்: மரண பயத்தை காட்டிய 15 நிமிடங்கள்… காண்போரை பதைபதைக்க வைக்கும் வீடியோ…!

ராஜஸ்தானில் ரீல்ஸ் மோகத்தால் இளைஞர் ஒருவர் விசித்திரமான விபத்தில் சிக்கிய சம்பவம் சமூக வலைதளங்களில் பேசுபொருளாகியுள்ளது. ஆழ்வார் மாவட்டம் மதோகார் கிராமத்தைச் சேர்ந்த காலுராம் என்ற இளைஞர், தனது நண்பருடன் இருசக்கர வாகனத்தில் கோதுமை வியாபாரத்திற்காகச் சென்றபோது இந்தச் சம்பவம் நிகழ்ந்துள்ளது. வெயிலின் தாக்கம் அதிகமாக இருந்ததால், வேடிக்கையாகவும் அதேசமயம் வெயிலில் இருந்து தப்பிக்கவும் தான் வைத்திருந்த காலி பால் கேனை தனது தலையில் கவிழ்த்துள்ளார்.

இந்த வேடிக்கையான காட்சியை ஒரு ‘ரீல்ஸ்’ வீடியோவாகப் பதிவு செய்ய அவர் முயன்றபோது, எதிர்பாராத விதமாக அந்தப் பால் கேன் அவரது கழுத்து வரை இறங்கி தலையில் மிக இறுக்கமாக மாட்டிக்கொண்டது. எவ்வளவு முயற்சி செய்தும் அதனை அவரால் கழற்ற முடியவில்லை. இதனால் மூச்சுவிடக் கூட சிரமப்பட்ட காலுராம், என்ன செய்வது என்று தெரியாமல் திணறிப்போனார். அவரது நண்பர்களும் குடும்பத்தினரும் செய்த முயற்சிகள் அனைத்தும் தோல்வியில் முடிந்தன.

இறுதியில், வேறு வழியின்றி அந்த இளைஞரை அருகில் இருந்த ஒரு ஹார்ட்வேர் கடைக்கு அழைத்துச் சென்றனர். அங்குள்ள ஊழியர்கள் இரும்பு மற்றும் பிளாஸ்டிக்கை வெட்டும் கருவிகளைக் கொண்டு மிகவும் கவனமாகப் பால் கேனை வெட்டி எடுத்தனர். பல மணிநேரப் போராட்டத்திற்குப் பிறகு, காயங்கள் ஏதுமின்றி காலுராம் அந்தப் பாத்திரத்தில் இருந்து மீட்கப்பட்டார். இக்கட்டான சூழலிலும் அவர் அந்தப் பால் கேனுடன் இருசக்கர வாகனத்தில் வலம் வந்த காட்சிகள் தற்போது இணையத்தில் வைரலாகி வருகின்றன.

சமூக வலைதளங்களில் லைக்குகளையும் பார்வைகளையும் பெறுவதற்காக இளைஞர்கள் செய்யும் இது போன்ற ஆபத்தான முயற்சிகள் விபரீதத்தில் முடிவதைக் காட்டும் மற்றொரு எச்சரிக்கையாக இச்சம்பவம் அமைந்துள்ளது. ரீல்ஸ் எடுக்கும் ஆர்வத்தில் பாதுகாப்பை மறந்து செயல்படுவது உயிருக்கே ஆபத்தாக முடியும் என்பதை இந்தச் சம்பவம் நமக்கு உணர்த்துகிறது. தற்போது காலுராம் நலமாக இருந்தாலும், சமூக வலைதளங்களில் அவர் கடுமையான விமர்சனங்களுக்கும் கேலிகளுக்கும் உள்ளாகி வருகிறார்.