மக்களவை எதிர்க்கட்சித் தலைவரும், காங்கிரஸ் மூத்த தலைவருமான ராகுல் காந்தி இன்று (ஆகஸ்ட் 1) ஒருநாள் பயணமாக சென்னை வருகை தருகிறார். மாமல்லபுரத்தில் நடைபெற்று வரும் தமிழ்நாடு காங்கிரஸ் கட்சியின் மாவட்ட நிர்வாகிகள் பயிற்சி முகாமின் நிறைவு விழாவில் பங்கேற்று உரையாற்றுவதற்காகவே அவர் தமிழகம் வருகிறார். ராகுல் காந்தியின் இந்தச் சென்னை வருகையின் போது, தமிழக முதல்வர் ஜோசப் விஜய்யைச் சந்தித்துப் பேசுவாரா என்ற கேள்விகள் அரசியல் வட்டாரத்தில் எழுந்தன.
இது தொடர்பாகச் சென்னை விமான நிலையத்தில் செய்தியாளர்களிடம் பேசிய தமிழ்நாடு காங்கிரஸ் கமிட்டி தலைவரும், எம்.பியுமான மாணிக்கம் தாகூர், ராகுல் காந்தியின் இந்தப் பயணம் முழுக்க முழுக்க காங்கிரஸ் கட்சியின் உட்கட்சி சார்ந்த நிகழ்ச்சி மட்டுமே என்று தெளிவுபடுத்தினார். மாமல்லபுரத்தில் உள்ள 74 காங்கிரஸ் மாவட்டத் தலைவர்களிடையே உரையாற்றுவதே அவரின் முதன்மை நோக்கம் என்றும், அதனால் இந்த விஜயத்தின் போது தமிழக முதல்வர் ஜோசப் விஜய்யைச் சந்திப்பதற்கு வாய்ப்பில்லை என்றும் அவர் திட்டவட்டமாகத் தெரிவித்தார்.
முன்னதாக, தமிழக முதல்வராக விஜய் பதவியேற்ற விழாவில் சிறப்பு விருந்தினராக ராகுல் காந்தி பங்கேற்றிருந்தார். அதன் தொடர்ச்சியாக, டெல்லி சென்ற முதல்வர் விஜய், காங்கிரஸ் மூத்த தலைவர்கள் சோனியா காந்தி, மல்லிகார்ஜுன கார்கே மற்றும் ராகுல் காந்தியை நேரில் சந்தித்துப் பேசியிருந்தார். தற்போது விஜய் தலைமையிலான தமிழ்நாடு அமைச்சரவையில் காங்கிரஸ் கட்சியைச் சேர்ந்த இரண்டு பேர் அமைச்சர்களாகப் பொறுப்பு வகித்து வரும் சூழலில், மாணிக்கம் தாகூரின் இந்த விளக்கம் முக்கியத்துவம் பெறுகிறது.
மேலும் பேட்டியின் போது மேகதாது அணை விவகாரம் குறித்துப் பேசிய மாணிக்கம் தாகூர், இந்தச் சிக்கலில் பிரதமர் மோடி, கர்நாடக மற்றும் தமிழக முதல்வர்களே முடிவெடுக்க வேண்டிய முக்கிய நபர்கள் என்றார். அத்துடன் பாமக தலைவரின் விமர்சனங்களுக்கும் காட்டமாகப் பதிலளித்த அவர், மேகதாது விவகாரத்தில் அன்புமணிக்குத் துணிச்சல் இருந்தால் டெல்லி சென்று பிரதமர் மோடியிடம் கூட்டணி குறித்துப் பேச வேண்டும் என்றும், தொடர்ந்து ராகுல் காந்தியை தேவையில்லாமல் விமர்சித்தால் பாமக தலைவர் பற்றிய பல்வேறு உண்மைகளை வெளியிட நேரிடும் என்றும் எச்சரித்தார்.