“திமுகவுக்கு டாட்டா? விஜய்க்கு எஸ்?”… ராகுல் காந்தியின் திடீர் மூவ்… தமிழக அரசியலில் பெரும் நிலநடுக்கம்….!

தமிழக அரசியலில் 2026 சட்டமன்றத் தேர்தலுக்கான களம் இப்போதே சூடுபிடிக்கத் தொடங்கியுள்ள நிலையில், காங்கிரஸ் கட்சியின் அடுத்தகட்ட நகர்வு குறித்த எதிர்பார்ப்பு அதிகரித்துள்ளது. தற்போது திமுக கூட்டணியில் அங்கம் வகிக்கும் காங்கிரஸ், வரும் தேர்தலிலும் அதே கூட்டணியில் நீடிப்பதா அல்லது நடிகர் விஜய் தொடங்கியுள்ள தமிழக வெற்றிக் கழகத்துடன் (தவெக) கைகோர்ப்பதா என்பது குறித்த முக்கிய ஆலோசனை இன்று டெல்லியில் நடைபெறுகிறது. அகில இந்திய காங்கிரஸ் தலைவர் மல்லிகார்ஜுன கார்கே மற்றும் மக்களவை எதிர்க்கட்சித் தலைவர் ராகுல் காந்தி ஆகியோரைத் தமிழக காங்கிரஸ் நிர்வாகிகள் நேரில் சந்தித்துப் பேச உள்ளனர்.

தமிழக காங்கிரஸ் கட்சியைப் பொறுத்தவரை, திமுக கூட்டணியில் அதிக இடங்களைப் பெற வேண்டும் அல்லது ஆட்சியில் பங்கு வேண்டும் என்ற கோரிக்கை ஒருபுறம் வலுத்து வருகிறது. அதேசமயம், தவெக தலைவர் விஜய்யின் மக்கள் செல்வாக்கை அறுவடை செய்யும் நோக்கில், அக்கட்சியுடன் கூட்டணி அமைத்தால் கேரளா, கர்நாடகா உள்ளிட்ட அண்டை மாநிலங்களிலும் காங்கிரஸை வலுப்படுத்த முடியும் என ஒரு தரப்பினர் கருதுகின்றனர். இந்தச் சூழலில், தமிழக காங்கிரஸ் தலைவர் செல்வப்பெருந்தகை உள்ளிட்ட முக்கிய நிர்வாகிகள் கலந்துகொள்ளும் இந்த ஆலோசனைக் கூட்டம் மிகுந்த அரசியல் முக்கியத்துவம் வாய்ந்ததாகப் பார்க்கப்படுகிறது.

இந்த ஆலோசனையின் முடிவில் திமுகவுடனான உறவைத் தொடர்வதா அல்லது புதிய அரசியல் மாற்றத்தை நோக்கிப் பயணிப்பதா என்பது குறித்த தெளிவான முடிவை மேலிடம் எடுக்கும் என எதிர்பார்க்கப்படுகிறது. நீண்ட காலமாக மௌனம் காத்து வந்த காங்கிரஸ் தலைமை, இன்று மாலைக்குள் தனது நிலைப்பாட்டை அறிவிக்க வாய்ப்புள்ளதால் தமிழக அரசியல் வட்டாரங்களில் பரபரப்பு தொற்றிக்கொண்டுள்ளது. விஜய்யின் வருகை தமிழக அரசியலில் ஒரு பெரிய தாக்கத்தை ஏற்படுத்தியுள்ள நிலையில், காங்கிரஸின் முடிவு வரும் சட்டமன்றத் தேர்தலின் தலையெழுத்தையே மாற்றக்கூடிய சக்தியாக அமையும் என அரசியல் விமர்சகர்கள் கருதுகின்றனர்.