தமிழக சட்டமன்றத் தேர்தல் நெருங்கி வரும் வேளையில், ஆளும் திமுக மற்றும் அதன் நீண்டகால கூட்டாளியான காங்கிரஸ் இடையே தொகுதிப் பங்கீடு மற்றும் அதிகாரப் பகிர்வு தொடர்பாக கடும் முரண்பாடுகள் வெடித்துள்ளன. குறிப்பாக, வரும் தேர்தலில் “ஆட்சியில் பங்கு மற்றும் அமைச்சரவையில் இடம்” வேண்டும் என்ற கோரிக்கையை காங்கிரஸ்
மேலிடம் மிக வலுவாக முன்வைத்துள்ளது. இதற்கு திமுக தரப்பில் இன்னும் பச்சைக்கொடி காட்டப்படாததால், ராகுல் காந்தி கடும் அதிருப்தியில் இருப்பதாகவும், மார்ச் 1-ஆம் தேதியை இதற்கான இறுதி எச்சரிக்கை நாளாக (Deadline) காங்கிரஸ் நிர்ணயித்துள்ளதாகவும் அரசியல் வட்டாரங்கள் தெரிவிக்கின்றன.
திமுக இணங்கி வராத பட்சத்தில், காங்கிரஸின் ‘பிளான் பி’ (Plan B) தயாராக இருப்பதாகக் கூறப்படுகிறது. அதன்படி, நடிகர் விஜய்யின் தமிழக வெற்றிக் கழகத்துடன் (TVK) கைகோர்க்க காங்கிரஸ் ரகசியப் பேச்சுவார்த்தைகளை முன்னெடுத்து வருகிறது. வரும் மார்ச் 5-ஆம் தேதி சென்னையில் காங்கிரஸ் நடத்தவிருக்கும் பிரம்மாண்ட பேரணிக்கு திமுக உள்ளிட்ட கூட்டணிக் கட்சிகளுக்கு இதுவரை அழைப்பு விடுக்கப்படவில்லை என்பது கவனிக்கத்தக்கது. ஒருவேளை திமுக இறங்கி வராவிட்டால், அன்றைய தினம் ராகுல் காந்தியும் விஜய்யும் ஒரே மேடையில் தோன்றி புதிய கூட்டணியை உறுதி செய்ய வாய்ப்புள்ளதாக சத்தியமூர்த்தி பவன் வட்டாரங்கள் தெரிவிக்கின்றன.
தமிழக வெற்றிக் கழகத் தலைவர் விஜய், காங்கிரசுக்கு சுமார் 100 இடங்கள் வரை ஒதுக்கத் தயாராக இருப்பதோடு, ஆட்சியில் 5 முதல் 6 அமைச்சரவைப் பதவிகளையும் வழங்க முன்வந்துள்ளதாகத் தெரிகிறது. திமுகவை விட தவெக தரப்பில் தாராளமான வாக்குறுதிகள் கிடைப்பது ராகுல் காந்தியை இந்தப் புதிய கூட்டணியை நோக்கிச் சிந்திக்கத் தூண்டியுள்ளதாகக் கூறப்படுகிறது. விஜய்யுடன் கைகோர்ப்பது காங்கிரஸைத் தமிழகத்தில் மீண்டும் ஒரு பலமான சக்தியாக மாற்றும் என்று டெல்லி மேலிடம் கருதுகிறது.
இந்த அரசியல் காய்நகர்த்தல்கள் அனைத்தும் முதலமைச்சர் மு.க.ஸ்டாலினுக்கு ஒரு மறைமுக அழுத்தத்தைக் கொடுக்கும் தந்திரமாகப் பார்க்கப்படுகிறது. மார்ச் முதல் வாரத்தில் ராகுல் காந்தியின் சென்னை வருகை, திமுகவுடனான உறவைத் தொடருமா அல்லது விஜய்யுடன் புதிய அத்தியாயம் தொடங்குமா என்பதைத் தீர்மானிக்கும். எது எப்படியிருப்பினும், ராகுல் – விஜய் கூட்டணி அமைந்தால் அது தமிழகத்தின் தற்போதைய அரசியல் களத்தையே தலைகீழாக மாற்றும் என்பதில் ஐயமில்லை.