உத்தரப் பிரதேச மாநிலம் குஷிநகர் மாவட்டம், ராம்கோலா எல்லைக்குட்பட்ட டெகுவாட்டார் பர்வா சாப்ரா கிராமத்தைச் சேர்ந்த 16 வயது சிறுவன் கிஷன் ராஜ்பர். இவர் நேற்று முன்தினம் தன் நண்பர்களுடன் சேர்ந்து கிராமத்தின் அருகே உள்ள கால்வாயில் மீன்பிடிக்கச் சென்றுள்ளார். அடர்ந்த நாணல் புதர்கள் நிறைந்த பகுதியில் மீன்பிடித்துக் கொண்டிருந்தபோது, அங்கிருந்த மலைப்பாம்பு ஒன்று கிஷனைத் தாக்கி, அவரது உடலை இறுக்கிச் சுற்றிக்கொண்டதாகக் கூறப்படுகிறது. பாம்பின் பிடியில் சிக்கிய சிறுவன் வலியால் அலறவே, அருகிலிருந்த மக்கள் ஓடிவந்து தடிகளால் பாம்பை அடித்துச் சிறுவனை மீட்டதாகத் தகவல்கள் வெளியாகின.
உடனடியாக மயக்கமடைந்த கிஷனை அவரது தந்தை ராம்கோலா சமூக சுகாதார மையத்திற்குக் கொண்டு சென்றார். அங்கு முதலுதவி அளிக்கப்பட்ட பின், மேல் சிகிச்சைக்காகக் குஷிநகர் அரசு மருத்துவக் கல்லூரி மருத்துவமனைக்கு அனுப்பி வைக்கப்பட்டார். இருப்பினும், அங்குச் சிறுவனைப் பரிசோதித்த மருத்துவர்கள் அவர் ஏற்கனவே உயிரிழந்துவிட்டதாகத் தெரிவித்தனர். இச்சம்பவத்தைத் தொடர்ந்து, மாவட்ட வன அலுவலர் வருண் சிங் உத்தரவின் பேரில் வனத்துறையினர் அடர்ந்த புதர்களில் மறைந்துள்ள மலைப்பாம்பைத் தீவிரமாகத் தேடி வருகின்றனர்.
இந்நிலையில், சிறுவனின் பிரேதப் பரிசோதனை அறிக்கை வெளியாகி அனைவருக்கும் பெரிய அதிர்ச்சியை ஏற்படுத்தியுள்ளது. கிஷன் மலைப்பாம்பு கடித்ததாலோ அல்லது பாம்பு இறுக்கியதாலோ உயிரிழக்கவில்லை எனவும், தண்ணீரில் மூழ்கியதே அவரது மரணத்திற்குக் காரணம் என்றும் அந்த அறிக்கையில் தெரிவிக்கப்பட்டுள்ளது. இதனால், பாம்பு நெரித்துக் கொன்றதாக எழுந்த தகவல்கள் பெரும் கேள்விக் குறியாக மாறியுள்ளன.
இது குறித்து ராம்கோலா காவல் நிலையப் பொறுப்பாளர் சந்திரபான் சிங் கூறுகையில், மலைப்பாம்பு சிறுவனைச் சுற்றிக்கொண்டதை நேரில் பார்த்த சாட்சிகள் யாரும் இல்லை என்றும், கிஷனுடன் மீன்பிடிக்கச் சென்ற சிறுவர்கள் கூறிய தகவலின் அடிப்படையிலேயே இந்தச் செய்தி பரவியதாகவும் விளக்கியுள்ளார். மீட்புக் குழுவினர் காப்பாற்றியதாகக் கூறப்படும் நிலையில், தண்ணீரில் மூழ்கி இறந்ததாக வந்த போஸ்ட் மார்ட்டம் ரிப்போர்ட்டும், தப்பியோடிய மலைப்பாம்பின் மர்மமும் அப்பகுதி மக்களிடையேயும் சமூக வலைதளங்களிலும் பெரும் விவாதத்தைக் கிளப்பியுள்ளது.