“27 வருடம் விஜயுடன்.. இப்போது ஸ்டாலினுடன்”.. 63 நாளில் பி.டி. செல்வகுமாருக்கு கிடைத்த ‘பவர்ஃபுல்’ பதவி…!

திரையுலகில் சுமார் 27 ஆண்டுகளுக்கும் மேலாக நடிகர் விஜய்யின் மேலாளராகவும், மக்கள் தொடர்பு அதிகாரியாகவும் பணியாற்றியவர் பி.டி. செல்வகுமார். விஜய்யின் திரையுலக வளர்ச்சியில் முக்கிய பங்காற்றிய இவர், ‘புலி’ உள்ளிட்ட படங்களைத் தயாரித்தவர் என்பதும் குறிப்பிடத்தக்கது. கடந்த சில ஆண்டுகளுக்கு முன்பு விஜய்யிடம் இருந்து பிரிந்த செல்வகுமார், ‘கலப்பை மக்கள் இயக்கம்’ என்ற அமைப்பைத் தொடங்கிச் செயல்பட்டு வந்தார்.

இந்நிலையில், கடந்த டிசம்பர் 11-ம் தேதி தமிழக முதல்வர் மு.க.ஸ்டாலின் முன்னிலையில் அண்ணா அறிவாலயத்தில் வைத்து பி.டி. செல்வகுமார் திமுகவில் இணைந்தார். தமிழக வெற்றிக் கழகத்தைத் தொடங்கி நடிகர் விஜய் அரசியலில் தீவிரமாக ஈடுபட்டு வரும் சூழலில், அவரது முன்னாள் மேலாளர் ஆளுங்கட்சியான திமுகவில் இணைந்தது அரசியல் வட்டாரத்தில் பெரும் பரபரப்பை ஏற்படுத்தியது.

கட்சியில் இணைந்த மிகக் குறுகிய காலத்திலேயே (சுமார் 63 நாட்களில்), பி.டி. செல்வகுமாருக்கு திமுக தலைமை முக்கியப் பொறுப்பை வழங்கியுள்ளது. திமுக பொதுச்செயலாளர் துரைமுருகன் வெளியிட்டுள்ள அறிவிப்பின்படி, பி.டி. செல்வகுமார் திமுக வர்த்தகர் அணியின் மாநிலத் துணைச் செயலாளராக நியமிக்கப்பட்டுள்ளார். கட்சிப் பணிகளில் அவரது அனுபவத்தைப் பயன்படுத்திக் கொள்ளும் நோக்கில் இந்த வாய்ப்பு வழங்கப்பட்டதாகக் கருதப்படுகிறது.

இவருடன் சேர்த்து, அதிமுகவிலிருந்து விலகி திமுகவில் இணைந்த முன்னாள் எம்.எல்.ஏ-க்களான ஏ. சுப்புரத்தினம் மற்றும் பாலகங்காதரன் ஆகியோருக்கும் முக்கியப் பொறுப்புகள் வழங்கப்பட்டுள்ளன. குறிப்பாக, சுப்புரத்தினம் திமுக செய்தித் தொடர்புத் துணைத் தலைவராகவும், பாலகங்காதரன் வர்த்தகர் அணி துணைச் செயலாளராகவும் நியமிக்கப்பட்டுள்ளனர். தேர்தல் நெருங்கும் வேளையில், மற்ற கட்சிகளில் இருந்து வந்த முக்கியப் புள்ளிகளுக்குப் பதவி வழங்கி திமுக அவர்களை உற்சாகப்படுத்தியுள்ளது.