உத்தரப் பிரதேச மாநிலம் ஹத்ராஸில், பேராசிரியர் ரஜனீஷ் குமார் என்பவர் 30-க்கும் மேற்பட்ட மாணவிகளைப் பாலியல் ரீதியாகத் துஷ்பிரயோகம் செய்ததாகக் கூறப்படும் விவகாரம் பெரும் அதிர்வலைகளை ஏற்படுத்தியுள்ளது. தேர்வுகளில் தேர்ச்சி பெற வைப்பதாகவும், நல்ல வேலை வாங்கித் தருவதாகவும் ஆசை வார்த்தை கூறி மாணவிகளைத் தனது வீட்டிற்கு வரவழைத்து, அவர்களைச் சீரழித்ததாக அவர் மீது புகார்கள் எழுந்தன. அவரது செல்போனைச் சோதனையிட்டபோது, மாணவிகளின் 65 ஆபாச வீடியோக்கள் கண்டெடுக்கப்பட்டது பெரும் அதிர்ச்சியை ஏற்படுத்தியது.
இந்த விவகாரத்தின் கொடூரமான மற்றொரு பக்கம் என்னவென்றால், கைப்பற்றப்பட்ட வீடியோக்களில் சில ஏற்கனவே ஆபாச இணையதளங்களில் பதிவேற்றம் செய்யப்பட்டிருந்தது தெரியவந்தது. மாணவிகளின் எதிர்காலத்தை வைத்து விளையாடிய அந்தப் பேராசிரியரின் செல்போன் ஆதாரங்கள் இவ்வளவு வலுவாக இருந்தபோதிலும், இந்த வழக்கு நீதிமன்றத்தில் விசித்திரமான ஒரு திருப்பத்தைச் சந்தித்தது. பாதிக்கப்பட்ட மாணவிகள் மற்றும் சாட்சிகள் பலரும் நீதிமன்றத்தில் பிறழ் சாட்சிகளாக (Hostile Witnesses) மாறியதால், வழக்கின் போக்கே மாறியது.
போதிய ஆதாரங்கள் இல்லை என்றும், சாட்சியங்கள் உறுதிப்படுத்தப்படவில்லை என்றும் கூறி நீதிமன்றம் ரஜனீஷ் குமாருக்கு இந்த வழக்கிலிருந்து விடுதலை அளித்தது. இவ்வளவு பெரிய குற்றச்சாட்டுக்கு உள்ளானவர் ‘கிளீன் சிட்’ (Clean Chit) பெற்றுத் தப்பியது சமூக ஆர்வலர்கள் மற்றும் பொதுமக்கள் மத்தியில் கடும் கொந்தளிப்பை ஏற்படுத்தியுள்ளது. பாதிக்கப்பட்ட மாணவிகளுக்கு இழைக்கப்பட்ட அநீதிக்குத் தார்மீக ரீதியாக இன்னும் நீதி கிடைக்கவில்லை என்பதே பலரின் கருத்தாக உள்ளது.