“பாப்பா என்கிட்ட வா”…. 2 ஆம் வகுப்பு சிறுமியை அழைத்து 24 வயது ஆசிரியர் செய்த கொடூரம்… தமிழகமே அதிர்ச்சி…!

கடலூர் மாவட்டம் பண்ருட்டி அருகே உள்ள சாத்திப்பட்டு கிராமத்தில் இயங்கி வரும் தனியார் மெட்ரிகுலேஷன் பள்ளியில், இரண்டாம் வகுப்பு படிக்கும் மாணவிக்கு பாலியல் தொல்லை அளித்ததாக 24 வயதான ஆங்கில ஆசிரியர் கைது செய்யப்பட்டுள்ளார். சுமார் 1,500-க்கும் மேற்பட்ட மாணவ-மாணவிகள் பயிலும் இப்பள்ளியில், வரவிருக்கும் சுதந்திர தின விழாவிற்கான கலை நிகழ்ச்சி ஒத்திகைகள் நடைபெற்று வந்துள்ளன. அதில் பங்கேற்ற 2-ஆம் வகுப்பு சிறுமியை வீட்டிற்கு செல்ல விடாமல், அப்பள்ளியில் பணியாற்றி வந்த ஆங்கில ஆசிரியர் அகஸ்டின் (24) என்பவர் பாலியல் தொல்லை கொடுத்ததாகக் கூறப்படுகிறது.

இச்சம்பவம் குறித்து அறிந்ததும் அதிர்ச்சியடைந்த சிறுமியின் பெற்றோர் மற்றும் கிராம மக்கள் திரளாகப் பள்ளிக்கு வந்து, சம்மந்தப்பட்ட ஆசிரியருடன் கடும் வாக்குவாதத்தில் ஈடுபட்டனர். அப்போது ஆத்திரமடைந்த பொதுமக்கள் சிலர் ஆசிரியரைத் தாக்கியதால் அங்கு பெரும் பரபரப்பு ஏற்பட்டது. இதுகுறித்துத் தகவலறிந்து வந்த காவல்துறையினர், பள்ளியை முற்றுகையிட்டுப் போராட்டத்தில் ஈடுபட்ட மக்களை அமைதிப்படுத்தி, குற்றஞ்சாட்டப்பட்ட ஆசிரியரைப் பொதுமக்களிடம் இருந்து மீட்டு காவல் நிலையத்திற்கு அழைத்துச் சென்றனர்.

இச்சம்பவம் தொடர்பாகப் பண்ருட்டி அனைத்து மகளிர் காவல்துறையினர் ஆசிரியர் அகஸ்டின் மீது வழக்குப்பதிவு செய்து தீவிர விசாரணை மேற்கொண்டு வருகின்றனர். இத்தகவல் பரவியதை அடுத்து, அச்சமடைந்த பெற்றோர் பலர் பள்ளிக்கு வந்து தங்களுடைய பிள்ளைகளைப் பாதுகாப்பாக வீட்டிற்கு அழைத்துச் சென்றனர். பள்ளி வளாகத்திலேயே மாணவிக்கு நேர்ந்த இந்தச் சீண்டல் சம்பவம் அப்பகுதி மக்களிடையே பெரும் அதிர்ச்சியையும் கொந்தளிப்பையும் ஏற்படுத்தியுள்ளது.